اسلام آباد۔ 25ستمبر (اے پی پی) وزیراعظم عمران خان نا اقوام متحدہ غان تران آ بنجائی وزیر داخلہ شیخ رشید احمد پارینے کہ وزیراعظم عمران خان اسہ وار ولدا بھاز جیرت اٹ اقوام عالم ءِ آدینک ءِ نشان تسنے۔ بنجائی وزیر داخلہ ہفتہ نا دے آ وزیراعظم عمران خان نا جنرل اسمبلی نا 76می دیوان نا وخت آ تران آ ردعمل ترسا تینا بیان اٹی پارے کہ تینا تران اٹی وزیراعظم دنیا ٹی ودوک آ زرگزرانی و راجی بے چینی نا سوب آتا احاطہ ءِ کرینے۔ شیخ رشید احمد پارے کہ وزیراعظم عمران خان اقوام متحدہ ٹی اوغان ویل ءِ سہی سیاق وسباق اٹ دنیا نا مون آ تخا نے۔ وزیراعظم عمران خان دنیا ءِ بھاز جیرت اٹ داہم پارے کہ ہراوڑسپرپاور آک اوغانستان اٹی گوازی کریر۔ شیخ رشیداحمد مستی پارے کہ وزیراعظم اوغان مجاہد آتا قیام و طالبان تا اقتدار اٹ بننگ اسکان نا داستان دنیا نا مون آ تخا۔ اوپارے کہ وزیراعظم عمران خان دنیا ءِ باور کرفینے کہ اینو اوغانستان اٹی حالیت آتا زموار پاکستان آخا بلکن امریکہ و ایلو ملک آک ءُ۔ اومچ آ دنیا ءِ پارے کہ پاکستان امریکہ و سیوتی فوج آتون تفسا بھا ز بھلو قیمت اس تسنے۔ شیخ رشید احمد پارے کہ وزیراعظم دنیا ءِ داہم پارے کہ ہراوڑ امریکہ پاکستان ءِ دہشت گردی نا رحم و کرم آ تنیا ہلا۔ ساڑی آ حالیت آتے ٹی اوغان تے تنیا ہلپننگ نا خواست وزیراعظم عمران خان نا انسان دوست پالیسی تا ڈیک ءِ۔ شیخ رشید احمد پارے کہ وزیراعظم عمران خان اسہ وار ولدا دنیا ءِ مودی نا ہندوستان نا فاشٹ چہرہ ءِ ہم نشان تسنے۔ اقوام عالم ءِ باور کرفنگ نا کوشست کرینے کہ ہراوڑ ہندوتوا نظریہ اقلیت آتے لتاڑنگ ءِ۔
