وزیراعظم جنرل اسمبلی آن تران اٹی کشمیر نا ویل، اوغان حالیت، نیزگار ملک آتیان پلوک آ زر و چاگڑد نا بارواٹ جوان ءُ گپ وتران اس کرے، بنجائی وزیر حوالکاری

اسلام آباد۔ 25ستمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ وزیراعظم عمران خان اقوام متحدہ نا جنرل اسمبلی آن تران اٹی کشمیر نا ویل، اوغانستان نا حالیت، نیزگار ملک آتیان پلوک آ زر و چاگڑد نا بارواٹ مدلل و جامع گپ وتران اس کرے، وزیراعظم دنیا نا مون آ بھارت نا فاشٹ دروشم ءِ بے نقاب کرے۔ اقوام متحدہ نا جنرل اسمبلی آن وزیراعظم نا ورچوئل تران نا ستاءِ کرسا ہفتہ نا دے آ تینا بیان اٹی بنجائی وزیر حوالکاری چوہدری فواد حسین پارے کہ وزیراعظم نا تران نا چار بنداوی سرحال ئسر، وزیراعظم داچار آ سرحال آتیا مدلل و جامع گپ وتران کرے۔ اوپارے کہ وزیراعظم عمران خان دنیا نامون آ بھارت نا فاشٹ دروشم ءِ بے نقاب کرے، وزیراعظم دنیا ءِ باورکرفے کہ ہراوڑ بھارت اٹی آرایس ایس نظریہ غا مودی نا فاشٹ حکومت اقلیت آتا کشت وخون ءِ کننگ ءِ۔ بنجائی وزیر حوالکاری پارے کہ عمران خان تینا تران اٹی نئے بیرہ پاکستان، ڈیہہ بلکن جہانی دنیا ءِ مون تروک چیلنج آتا گچین احاطہ ءِ کرے۔ اوپارے کہ وزیراعظم دنیا ءِ پارے کہ اوغانستان ءِ تنیا ہلنگا تو دا ڈیہہ و مچ آ دنیا کن خطرناک مریک۔ اوپارے کہ وزیراعظم تینا تران اٹی نیزگار ملک آتیان پلوک آ زر ءِ ہزگار ملک آتیا گدریفنگ نا حوصلہ شکنی ءِ کننگ نا گرج آ ہم زور شاغا۔ وزیراعظم باور کرفے کہ نیزگار ملک آتیان پلوک آ زر آتے ہزگار ملک آتیا گدریفنگ آن ہزگار ملک آتا برخلاف خار ودی مننگ ءِ۔ چوہدری فواد حسین پارے کہ وزیراعظم موسمیاتی بدلی آن کرہ ارض ءِ مون تروک خطرہ کن تینا جہانی زمواری تا رداٹ کروک آ گام گیج آتیان ہم معلومدار کرے۔