اسلام آباد۔ 25ستمبر (اے پی پی) اسہ ڈیہہ اسہ سڑک (بی آرآئی) اوغانستان اٹی امن، شونداری و شونہالی نا استطاعت تخک۔ بی آر آئی نا ڈٹ انا زرگزرانی و شونداری نا ویژن نا رداٹ اوغانستان اٹی امن و شونداری و شونہالی ءِ پک کننگ مریک۔ چین آن بیدس بی آر آئی ٹی اوار ایلو ملک آک علاقائی رابطہ غاتا مون آ دننگ نا کمک اٹ اوغانستان تون اقتصادی تعلقداری تے ودفنگ ءُ وخت اس کہ مواصلات نا نیٹ ورک انا جوڑ کننگ آن اوغانستان نا زرگزرانی سوگوی نا پین وارخواہی ودی مریک۔ داخیال آتا درشانی ءِ فرینڈز آف بی آر آئی فورم نا کنڈآن ”بی آر آئی اوغانستان نا امر کمک ءِ کننگ مریک“ نا سرحال آ اڈ ہلوک آ ویبینار آن تران کرسا کریر۔ ژی جیانگ میڈیا پڑک نا ایڈیٹر انچیف نا ژی سیشن نا مہمانداری ءِ کرسا ویبینار نا بنداوی مسخت آتے تالان کرے۔ اوپارے کہ ویبینار نا اڈتننگ نا مسخت اوغانستان نا ساڑی آ تنکی آ چاہندار آتا خیال آتیان فائدہ ہرفنگ ءِ تانکہ بی آر آئی ٹی اوار ملک آک اوغانستان نا انسانی بنداوتیا کمکاری کن شریداری ءِ ودفنگ کیر۔ فرینڈز آف بی آر آئی فورم نا شریک بانی فرحب آصف فرینڈز بی آر آئی نااہم گام گیج آتے تالان کرسا پارے کہ فورم نا کنڈآن 138ملک آتے ٹی اوغانستان تون اوار کاروبار، میڈیا، تعلیمی ادارہ غاتا رابطہ و مچ آ دنیا نا جہانی ادارہ غاتا شریداری ٹی ودکی نا بابت چندی ویبینار اڈترفینے۔ شلر انسٹیٹیوٹ سویڈن نا چیئرمین الف سینڈ مارک پارے کہ اوغانستان ءِ انسانی امداد و خاص وڑاٹ بروک آ یخ آتے ٹی جہانی برادری نا امداد نا گرج ءِ انتئے کہ اوغانستان اٹی کم و ود 90درسد ءِ جان جوڑی نا جوان آسراتی دوئی اف۔ اوپارے کہ بی آر آئی اوغانستان اٹی خور و جان جوڑی نا بابت تینا کڑد ءِ ادا کننگ کیک۔
