لاہور۔ 13ستمبر (اے پی پی) قومی کرکٹ ٹیم انا مسکوہی کیپٹن و ورلڈ کپ 1992نا کٹوک آ ٹیم انا باسک رمیز راجہ بے مقابلہ غان پاکستان کرکٹ بورڈ انا 36می چیئرمین گچین مسنے۔ او بروک آ مسہ سال اکن پاکستان کرکٹ بورڈ انا چیئرمین جوڑ مسنے۔ پاکستان کرکٹ بورڈ انا وپوسکن آ چیئرمین نا گچین کاری کن گورننگ بورڈ انا خصوصی دیوان تدوک آ دے نیشنل ہائی پرفارمنس سینٹر اٹی مس، ہراناکماشی ءِ بورڈ انا الیکشن کمشنر جسٹس ریٹائرڈ شیخ عظمت سعید کرے۔ پی سی بی نا پیٹرن و وزیراعظم عمران خان 27اگست آ رمیز راجہ آن بیدس اسدعلی خان ءِ مسہ سال اکن پی سی بی نا بورڈ آف گورنر نا باسک پن کریسس۔ داکان بیدس عاصم واجد جواد، عالیہ ظفر، عارف سعید، جاوید قریشی و وسیم خان چیف ایگزیکٹیو پی سی بی ہم بورڈ آف گورنر نا بشخءُ۔ رمیز راجہ ٹیسٹ کرکٹ اٹ پاکستان نا 18می و ون ڈے انٹرنیشنل کرکٹ اٹ 12می کیپٹن ءِ۔ سال 1984آن1997آ تالان تینا جہانی کرکٹ کیریئراٹ رمیز راجہ جم وڑاٹ 255انٹرنیشنل میچ آتے ٹی پاکستان نا نمائندگی ءِ کرسا 8674رنز کرے۔ او سال 2003آن 2004اسکان پاکستان کرکٹ بورڈ انا چیف ایگزیکٹیو ہم رہینگانے۔ او آئی سی سی چیف ایگزیکٹیو کمیٹی ٹی ہم پاکستان نا نمائندگی ءِ کرینے۔ رمیز راجہ ایم سی سی نا ساڑی آ ورلڈ کرکٹ کمیٹی نا باسک ءِ۔ اونا شمار دنیا نا پنی آ براڈ کاسٹر آتے ٹی مریک۔ رمیز راجہ چارمیکو کرکٹر ءِ ہرا پی سی بی نا چیئرمین گچین مسنے۔ اوڑآن مست مسکوہی کرکٹر ز عبدالحفیظ کاردار(1972-77) جاوید برکی(1994-95)، اعجاز بٹ (2008-11) چیئرمین بی سی بی نا عہدہ ءِ سنبھالانو۔
