نن اوغان الس تون پورو یکجہتی و اوفتا مخ تفی ءِ کین، اوغانستان نا سوگوی ٹی ہمسایہ ملک آتا براہ راست فائدہ ءِ، وزیرخارجہ شاہ محمود قریشی

اسلام آباد۔ 08ستمبر (اے پی پی) وزیرخارجہ شاہ محمود قریشی پارینے کہ اوغانستان اٹی پوسکن آ حالیت آتے پوسکن آ رداٹ خنان و اسہ حقیقت پسندانہ و زمینی راستکی تا رداٹ انداز فکر ءِ تینا کرسا مون آ ہِننگے، نن اوغان الس تون پورو یکجہتی و اوفتا مخ تفی ءِ کین، اوغانستان نا سوگوی ٹی ہمسایہ ملک آتا براہ راست فائدہ ءِ۔ جہانی برادری داکلیدی و نازرک ریسہ غا تینا رابطہ ءِ برقرار تخے، سفارتی و جہانی ساڑی گری نا تجدید آن اوغان السءِ اسہ پوسکن ءُ یخین و پت اس دوبریک۔ اوچارشنبے نادے آ اوغانستان ناحالیت آتیا وزارت خارجہ ٹی علاقائی وزرائے خارجہ ورچوئل کانفرنس آن تران کریکہ۔ کانفرنس نا مہمانداری ءِ پاکستان کرے، ورچوئل کانفرنس اٹ چین، ازبکستان، ترکمانستان، تاجکستان و ایران نا وزیرخارجہ غاک بشخ ہلکر۔ وزیرخارجہ پارے کہ تدوک آ منہ ہفتہ ٹی مروک آ واقعہ غاک ننا ڈیہہ ءِ جہانی چکار نا مرکزکرینو۔ بے گمانی و اناگت وقوع پزیر مروک آ داواقعہ غاتیان ایڑتر اہمیت داہیت انا ءِ کہ دہائی تیان برجا خون خرابہ ءِ دُوارہ یات کننگتو۔ مریس جھیڑہ و خانہ جنگی نا گمان ایہن تو چٹانے۔ ولے داکان پد ہم حالیت آک پیچیدہ و نزور ءُ۔ ولے اسہ ہیت اس پک ءِ کہ نن غٹ اوغانستان اٹ بدل مروک حقیقت تون تگ و دود اٹ لگوک اُن۔ وزیرخارجہ پارے کہ طالبانک عبوری حکومت ناپڑو ءِ کرینو۔ نن داپیش رفت ءِ خنانن۔ ننے اومیت ءِ کہ سیاسی حالیت آک زوت آن زوت سوگو مریرہ و حالیت آک گچین مریرہ۔ ننا کوشست آتا بنداوی وت و مرکز اوغان الس نا راجی آسراتی و گچینی مرے ہرا چِل سال آن زیات وخت آ تالان جھیڑہ و نزوری آن بے پناہ زہمی مسنو۔ اوغانستان اٹی پیش بروک واقعہ غاتا غٹ شش ہمسایہ ملک آتے کن پیدوار مضمرآتارداٹ نن خڑکی رابطہ و شریداری آ امنا کریسن۔