اسلام آباد۔ 23جون (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ اپوزیشن نا کنڈآن صدارتی نظام و ہژدہ می ترمیم نا شوشا تا حکومت نا کنڈآن تردید ءِ کیوہ، اسہ آل پارٹیزکانفرنس اس کانودسازی کننگ کپک، پارلیمنٹ نا بالادستی نا ہیت ءِ کیرہ تو پارلیمانی کمیٹی تا بائیکاٹ ءِ کننگ ناجاگہ غا ایوان آ بریر، حکومت مہالوہم سنجیدہ اس و اینو ہم ارے۔ وزیراعظم عمران خان کانود نا بالادستی کن ادارہ غاتے سوگو کننگ خواہک، بجٹ ءِ گیشتری اٹ منظور کرفنہ۔ چارشنبے نادے آ قومی اسمبلی ٹی بجٹ آ ہیت کرسا اوپارے کہ 1984ء آن 2017ء اسکان نا بجٹ جوڑکروک آتے ٹی بیدس مفتاح اسماعیل آن ایلوغٹ ملک ءِ ہلسا ہنانو، شہباز شریف ءِ مخ انا دڑد ئس ولے اوکان پد ہم چار گھنٹہ اسکان اوقومی اسمبلی ٹی تقریر کرے و چار دے اسکان اٹھک بیٹھک کرساکرے۔ اوپارے کہ ملک انا غٹ آن بھلا ویل کورونا نا ئس ہرادے وزیراعظم عمران خان نا ویژن نا رداٹ جوان وڑاٹ ہینڈل کننگا۔ اوپارے کہ داہزگارآتا آخا غریب آتا بجٹ ءِ، ہیت کننگ نا جاگہ دااسمبلی ءِ، برطانیہ نا اسمبلی آخا۔ اگہ داپیشن تولوک ہیت کیرہ تو داوڑنا ہیت کروک آتے پاکستان نا الس مسترد کیک۔ اوپارے کہ داپاننگانے کہ ہڑدڑمس و اسپیکر ہچ اس کتو حالانکہ اسپیکر بے پرخ کارروائی کرے و جھگڑاٹی اوار مروک آتا برخلاف کارروائی کرے۔ اوپارے کہ نروک آ لیڈرآتے پارکہ او پدی بریر، عدالت آک پانامہ نا ہریفسا ہریفسا دم درینگانو، اوفک بایدی ورندی ایتر۔ اوپارے کہ صدارتی نظام نا کسر ءِ آوار کننگ و ہژدہ می ترمیم ءِ چٹفنگ نا بابت ہیت کننگ انگ ءِ، ای حکومت نا کنڈآن اوفتا سختی اٹ تردید ءِ کیوہ۔ داہڑتوم آ ہیت آک اپوزیشن نا کنڈآن شوشاءُ۔
