اسلام آباد۔ 06 مئی (اے پی پی) وزیراعظم عمران خان اینو پنچ شنبے نادے آ لاہور نا اسہ دے ئی دورہ ءِ کیک۔ داٹی او پنجاب پیری اربن کم خڑچ ہاؤسنگ اسکیم نا ڈٹ انا بناءِ کیک۔ 10 آن زیات سائٹ آتا ڈٹ انا بناءِ کننگ کن گچینی ءِ کننگانے۔ ڈٹ انا بناء نا بھلا دود رائیونڈ اٹی مریک ہراٹی وزیراعظم مہمان خاص مریک۔ دا اسکیم ءِ پنجاب نا چنکا شار و خلق آتے ٹی رہینگوک آ کم کٹیا والا بندغ آتے کن جوڑ کننگانے۔ داڈٹءِ حکومت پنجاب و نیاپاکستان ہاؤسنگ اینڈ ڈویلپمنٹ اتھارٹی نا شریداری اٹ عملی دروشم اس تننگ انگ ءِ۔ ڈٹ انا رداٹ چنکا ہنکینی کالونی، ہرافتے ٹی زیات تر 100آن 500 ہاؤسنگ یونٹ اوار ءُ، پنجاب نا نواحی شار و خلق آتا کیبی علاقہ غاتے ٹی تفنگک۔ بورڈ آف ریونیو پنجاب نا کمک اٹ ڈغار ءِ بھاز کم نہاد اٹ فراوان کننگک۔ دارداٹ بورڈ آف ریونیو پنجاب پنجاب نا 35 ضلع غاتے ٹی 133 سائٹ آتا پیش کش کرینے۔ حکومت پنجاب اولیکو ریسہ نا سائٹ آتے کن ہند آتیا لینڈ و انفراسٹرکچر ڈویلپمنٹ نا کاریم تیکن فنڈ تننگ ءِ۔
