سرینگر۔ 06 مئی (اے پی پی) غیر کانودی وڑاٹ بھارت نا کوزہ ٹی جموں و کشمیر اٹی کل جماعتی حریت کانفرنس نا سینئر راہشون و تحریک حریت جموں و کشمیر نا چیئرمین محمد اشرف صحرائی ءِ کپواڑہ نا علاقہ لولاب اٹی اونا باوہ پیرہ ئی آ خلق ٹکی پورہ ٹی سخت فوجی محاصرہ ٹی جہہ جاگہ کننگا۔ گڑاس کمامدارآک مخلوق نا ہن و برآ سخت پابندی خلکوسر و مچ آ علاقہ نا ناکہ بندی ءِ کننگاسس۔ کشمیر میڈیا سروس نا رداٹ بھاز کم اٹو کچ اسے ٹی مخلوق ءِ ہرافتے ٹی گیشتر اونا قریبی رشتہ دار ئسر ءِ شہید راہشون نا نماز جنازہ ٹی بشخ ہلنگ و اونا آخیری دیدن نا موکل تننگاسس۔ بھارتی فوج محمد اشرف صحرائی نا جنازہ ٹی بھلو کچ اسے ٹی مخلوق نا بشخ ہلنگ ءِ توننگ کن مچ آمقبوضہ دامان اٹی سخت پابندی نافذ کریسر۔ میت نا بننگ و جہہ جاگہ نا وخت آ مچ آ خلق اٹی بجلی پورو وڑاٹ بندکننگاسس ہراڑآن مچ آ علاقہ پورو تہاری ٹی ڈبنگاسس۔ اونا میت ءِ جموں آن اونا باوہ پیرہ ئی خلق آ پولیس نا تحویل اٹ اتنگا۔ سے شنبے نادے آ محمداشرف صحرائی نا طب بھلو حد اسسکان خراب مننگ آ اودے اودھمپور جیل آن گورنمنٹ میڈیکل کالج جموں آ گدریفنگاسس۔ محمد اشرف صحرائی ءِ زندان اٹ درمان تون اوار غٹ بنداوی آسراتی تیان محروم تخنگاسس ہرانا سوب آن اونا صحت ترندی اٹ خراب مرساہنا۔ کل جماعتی حریت کانفرنس کشمیری الس آن پبی خواست کرینے کہ او تینا اُراتیان پیش تمسا مودی حکومت نا بیدادی نا برخلاف زبردست مظاہرہ کریر۔ حریت کانفرنس مخلوق ءِ پارینے کہ او مچ آ مقبوضہ علاقہ ٹی جاگہ جاگہ غا ایماندار راہشون نا غائبانہ نماز جنازہ ءِ خوانر۔ پیشن نا ملک رہینگوک آ کشمیری و پاکستانی و مچ آ دنیا نا امن پسند مخلوق آن ہم برانزی مچی و اشرف صحرائی نا غائبانہ نماز جنازہ ءِ ادا کننگ نا خواست کننگانے۔
