کوئٹہ۔ 06 مئی (اے پی پی) تحریک جوانان کوئٹہ نا ضلعی صدر کمانڈر شائستہ خان نورزئی کوئٹہ ٹی ایگل اسکواڈ نا سم کاری آن ورنا میر فیضان جتک نا زوال و اونا ایلم ءِ ٹھپی کننگ نا واقعہ نا مذمت ءِ کرسا خواست کرینے کہ واقعہ ٹی اوار ایگل اسکواڈ نا کارندہ غاتے دمدستی وڑاٹ دزگیر کرسا اوفتے اوفتا کروک نا سزا تننگے۔ داڑے جاری مروک اسہ بیان اسے ٹی کمانڈر شائستہ خان نورزئی پارے کہ سریاب نا علاقہ ٹی ایگل اسکواڈ نا سم کاری آن قبائلی راہشون میرداد محمد جتک نا مار فیضان جتک نا زوال و اونا ایلم ءِ ٹھپی کننگ نا واقعہ نا مذمت ءِ کرسا پارینے کہ الس نا جان و مال انا رکھ آ سلوک پولیس کارندہ غاک الس نا قاتل جوڑ مسنو۔ اوپارے کہ کوئٹہ ٹی پولیس سم کاری آن ورنا نا خون اسہ است ہسون واقعہ اسے۔ ہرانا تحریک جوانان پاکستان ترندانگا لوز آتے ٹی مذمت ءِ کیک۔ اوخواست کرے کہ فیضان جتک نا قتل اٹ اوار ایگل اسکواڈ نا کارندہ غاتے دمدستی وڑاٹ دزگیر کرسا کانودنا رداٹ اوفتے اوفتا کروک نا سزا تننگے و مقتول نا خاہوت ءِ انصاف فراوان کننگے۔ کمانڈر شائستہ خان نورزئی سم کاری آن زوال کروک آ ورنانا خاہوت تون ہڑزخواہی کرسا دعا کرے کہ اللہ تعالیٰ ایماندار ءِ جنت اٹ جاگہ ایتے و پدسلوک آتے صبر کننگ نا توفیق ایتے۔
