کورونا دین آن زہمی پدتموک ملک آتے ویکسین نا دمدستی و بریبر فراوانی اسکان نسخان تیان بحالی مشکل مریک، اقوام متحدہ نا اقتصادی و راجی کونسل نا صدر منیر اکرم نا دیوان آن تران

اقوام متحدہ۔ 05 مئی (اے پی پی) اقوام متحدہ نا اقتصادی و راجی کونسل (ای سی او ایس او سی) نا صدر و اقوام متحدہ ٹی پاکستان ناآخبتی مندوب منیر اکرم پارینے کہ کورونا غان زہمی پدتموک ملک آتے ویکسین نا دمدستی و بریبرفراوانی اسکان بحالی مشکل مریک۔ اوتدوک آ دے ای سی او ایس او سی نا کنڈآن پائیدار شونداری ہدف آتا دوئی کننگ کن سائنس ٹیکنالوجی و جدت پسندی آ 2 دے ئی ورچوئل ملٹی اسٹیک ہولڈر فورم اٹ تینا تران اٹی پارے کہ انسانی بقا و اونا شونداری کن سائنس، ٹیکنالوجی و جدت پسندی و اختراع نا کڑد بھاز اہم ءِ و دا چرجوئی ٹی ہراتم اسکان کورونا دین آن بچنگ کن ویکسین نا دمدستی و بریبر فراوانی کننگپک ہمووخت اسکان پدتموک ملک آتے کن کورونا دین انا سوب مروک آ زرگزرانی نسخان آن بحالی مشکل مریک و دابیرہ سائنس، ٹیکنالوجی و جدت پسندی ہی ءِ ہرانا سوب آن ڈیجیٹل ٹیکنالوجی نا کمک اٹ ویکسین نا تیاری و کاروباری سرجزآتا بحالی نا دروشم اٹ اومیت نا روشنائی نظر بسنے۔ اوپارے کہ ریاست آک کورونا نا دین انا تباہ کن اثرآتون مون تننگ کن ورکنگ، لرننگ و فراوانی نا خذمت و راجی رابطہ ءِ برقرار تخنگ نا پوسکن آ وڑوڈول آتا کمک اٹ سائنس، ٹیکنالوجی و جدت پسندی آن فائدہ ہرفینے۔ دیوان اٹی اقوام متحدہ نا سیکرٹری جنرل انتونیوگوتریش نا اسسٹنٹ ماریا فرانسسکا سپیتو لیسانوسیکرٹری جنرل نا بیان اقوام متحدہ نا محکمہ اقتصادی و راجی امور آ سرکرے۔ سیکرٹری جنرل پارے کہ ہراڑے سائنس انا سوب آن نئے بیرہ کم وخت اٹی کورونا دین آن بچفنگ نا ویکسین ءِ تیار کننگا بلکن کورونا دین انا تنکی دوائی و ڈیجیٹل کمیونیکیشن ٹیکنالوجی تیٹی ہم جدت اٹ ودکی کرینے ہموسائنسی ایجادات و کمکاری ٹی ترندی بسنے و خذمت آتا فراوانی نا پوسکن ءُ کسر ودی کرینے۔