درملکی کمپنیک نہہ تُو اٹی 1.13ارب ڈالر نا منافع پیشن نا ملک آ مون تسر، اسٹیٹ بینک

اسلام آباد۔ 05 مئی (اے پی پی) برجامالی سال انا اولیکو نہہ تُو اٹی درملکی کمپنیک 1.13ارب ڈالر نا منافع پیشن نا ملک آ مون تسر۔ اسٹیٹ بینک آف پاکستان (ایس بی پی) نا رپورٹ نا رداٹ جولائی آن مارچ 2020-21پاکستان اٹی زرکاری کروک آ درملکی کمپنی تا کنڈآن 1.13ارب ڈالر کٹیا تا مد اٹ تینا تینا ملک آتیا گدریفینو۔ جولائی آن مارچ 2019-20غیر ہندی کمپنی تا کنڈآن اسہ ارب ڈالر نا منافع ایلو ملک آتیا گدریفیسس۔ ایس بی پی نا رداٹ اینخو مالی سال اٹی فوڈ سیکٹر اٹی کاریم کروک آ غیر ہندی کمپنی تا کنڈآن غٹ آن زیات 221ملین ڈالر منافع غاتا مد اٹ پیشن نا ملک آ گدریفینو۔ ہنداوڑ مالیات نا بشخ انا کنڈآن داوخت اٹی 165.8ملین ڈالر دیارغیر آ گدریفنگانے۔ داکان بیدس ٹیلی کمیونیکیشن نا بشخ انا کنڈآن منافع غاتا گدریفنگ نا کچ 104ملین ڈالر وخت اس کہ ٹرانسپورٹ نا بشخ آن 106.5ملین ڈالر و آئل اینڈ گیس انا بشخ اٹی کاریم کروک آ درملکی کمپنی تا کنڈآن منافع غاتا پیشن نا ملک گدریفنگ نا کچ 95 ملین ڈالر ریکارڈ کننگانے۔ داکان بیدس تمباکو و سگریٹ آتا بشخ انا کنڈآن 85 ملین ڈالر مالیت نا منافع جات ایلو ملک آتیا گدریفنگانے۔