کوئٹہ۔ 05مئی (اے پی پی) بلوچستان امن جرگہ نا سروک لالا یوسف خلجی قلعہ عبداللہ نا تحصیل گلستان آن تعلق تخوک آ عزت خان کاکڑ ءِ جہانی وڑآ برمنگھم البامما ٹی ککس باکسنگ فائٹ اٹ تینا امریکی حریف ءِ شکست تننگ آ مبارکبادی ترسا پارینے کہ حکومت بلوچستان نا گوازی گر آتا جوان وڑاٹ سرپرستی ءِ کے تو ملک و پیشن نا ملک پاکستان نا پن ءِ روشنا کننگ کیرہ۔ داڑے جاری مروک آ اسہ بیان اسے ٹی لالایوسف خلجی پارے کہ ضلع قلعہ عبداللہ خان نا تحصیل گلستان عبدالرحمان آن تعلق تخوک آ عزت خان کاکڑ بھلو سخت ءُ حالیت اسے ٹی تینا محنت ءِ برجاتخسا تینا لائخی تا سوب آن ملک و پیشن نا ملک گوازی نا پڑ و باکسنگ نا مقابلہ غاتے ٹی اہم سرسہبی دوئی کرے و داتسکان کہ او داکان مست مسہ ہفتہ ٹی مسہ فائٹ آتا مقابلہ غاتے ٹی سرسہبی دوئی کرے و اودے دا شرف دوئی ءِ کہ او اولیکو ملکی باکسنگ نا گوازی گر ءِ ہرا بیدس گلوز و گیئرز فائٹ کرے و سرسہبی دوئی کرے۔ اوپارے کہ جہانی کہول انا باکسنگ نا مقابلہ غاتے ٹی عزت خان کاکڑ سرسہبی دوئی کرسا ملک و بلوچستان نا پن ءِ روشنا کرے ہراڑآ عزت خان کاکڑ و اونا خاہوت مبارکباد نا حقدار ءُ۔ اوپارے کہ بلوچستان نا گوازی گر آتے ٹی ٹیلنٹ نا ہچ ءُ کمتی اس اف وسیلہ مفننگ نا سوب آن او تینا لائخی تے منفنگ کپسہ۔ لالایوسف خلجی برمنگھم الباما ٹی ککس باکسنگ فائٹ نا مقابلہ ٹی شاندار سرسہبی آ مایہ ناز گوازی گر باکسر عزت خان کاکڑ ءِ اونا کوچ واکیڈمی نا باسک و اونا خاہوت ءِ است اٹ مبارکباد پیش کننگانے۔
