اسلام آباد۔ 04مئی (اے پی پی) بنجائی وزیر ڈٹ بندی، شونداری، اصلاحات و خصوصی گام گیج و نیشنل کمانڈ اینڈ آپریشن سینٹر نا سروک اسد عمر پارینے کہ فوج انا تعیناتی تون اوار ایلو پبی گام گیج آتا سوب کورونا غان بچنگ کن ایس او پی تیا عملدرآمد اٹی نمان گچینی بسنے۔ سے شنبے نادے آ تینا ٹویٹ اٹی اوپارے کہ قومی کہو ل آ ایس او پی تیا عملدرآمد نا کچ 25اپریل آ 34 درسد ئس ہرا 3 مئی آ ودسا 68 درسد مسنے۔ اوپارے کہ فوج انا تعیناتی و سوگو نفاذ آن ایس او پی تیا عملدرآمد گچین مس، این سی او سی نا سروک اسد عمر ایس او پی تا تعمیل نا سرجم آتے جاری کرے۔ ٹویٹر آ سرجم آتے جاری کرسا اسد عمر پارے کہ ایس او پی تیا عمل کننگ اٹ نمان گچینی مون آ بسنے و فوج انا تعیناتی تون اوار سوگو نفاذ نا گام گیج آتیان ایس او پی تیٹی گچینی بس۔ اوپارے کہ قومی کہول آ ایس او پی تا اوسط تعمیل اِراہنداخہ مسنے، قومی کہول آ ایس او پی تا تعمیل 25 اپریل 34 درسد ئس و 3 مئی آ 68 درسد مس وخت اس کہ عئید آ ایس او پی تا تعمیل نا کہول ءِ برقرار و استوار تخنگ نا گرج ءِ۔ اسدعمر نا پاننگ ئس کہ ایس او پی تیا 3 مئی اسکان عملدرآمد غٹ آن زیات 88 درسد بنجاٹی مس و غٹ آن کم ایس اوپی تیا عملدرآمد سندھ اٹی 45 درسد مس وخت اس کہ پنجاب اٹی 69، کے پی 66و بلوچستان اٹی 63 درسد عملدرآمد مس۔ بنجائی وزیر پارے کہ ارٹ میکو نمبر آ آزاد کشمیر اٹی ایس او پی تیا 82 درسد عملدرآمد کننگا و گلگت بلتستان اٹی کورونا ایس اوپی تیا 62 درسد عملدرآمد کننگا۔
