بھارت نا کنڈآن جنگ بندی نا بلااشتعال خلاف ورزی آ پاکستان نا گڑتی نا درشانی

اسلام آباد۔ 04 مئی (اے پی پی) پاکستان تدوک آ دوشنبے نا سہب اتون بھارتی بارڈر سیکورٹی فورس انا کارندہ غاتا کنڈآن رزاک اٹ ورکنگ باؤنڈری ءِ عبور کرسا پاکستان نا چار وہ سیکٹر اٹ جنگ بندی نا بلااشتعال خلاف ورزی آ سخت گڑتی نا ظاہر کرینے۔ چاروہ سیکٹر بھارت نا غیر کانودی کوزہ ٹی جموں و کشمیر نا جموں سیکٹر نا بالکل مون آٹے۔ کشمیر میڈیا سروس نا رداٹ اسلام آباد اٹی بھارتی ہائی کمیشن ءِ جاری تروک آ مراسلہ ٹی پاکستان نا وزارت خارجہ پارینے کہ مقبوضہ جموں و کشمیر نا جموں سیکٹر اٹی واقع بھارتی بی ایس ایف نا چوکی نا کارندہ غاک بلااشتعال پاکستان نا چاروہ سیکٹر اٹی چنکا سلہہ غاتا سی راؤنڈ و 60 ملی میٹر نا چار مارٹر بمب فائر کریر۔ مراسلہ ٹی پاننگانے کہ دا واقعہ ہمووخت آ پیش بس ہراتم 3 ٹیکٹر آتیا سوار 15بی ایس ایف کارندہ ورکنگ باؤنڈری ءِ عبور کرسا پاکستان نا علاقہ ٹی پترینگا۔ ہراتم پاکستان رینجرنا ورناک بی ایس ایف کارندہ غاتے ترند سائرن و سیٹی تا کمک اٹ پدی گدریفنگ نا کوشست کریر تو او بلااشتعال چنکا سلہہ و مارٹر توپ آتا کمک اٹ پاکستانی چوکی آ سم کاری نا بناءِ کرے۔ مراسلہ ٹی پین پاننگانے کہ جموں سیکٹر اٹی واقع بی ایس ایف پوسٹ پاکستانی چوکی آ سنائپر گن انا کمک اٹ ہم سم کاری کرے تانکہ پاکستانی ورنااسے شہید و ٹھپی کننگ مرے۔ وزارت خارجہ پارے کہ اودے پین حیرانی داہیت آ مس کہ دا خلاف ورزی ہمووخت آ مس ہراتم بھارتی میڈیا پاکستان آ جنگ بندی نا خلاف ورزی نا پروپیگنڈا کننگ ءِ۔ ہراتم بھارتی میڈیا ٹی چلینگوک آ خبر آتے ٹی جنگ بندی نا خلاف ورزی نا دوبہ پاکستان آ عائد کننگاکہ۔ دفترخارجہ پارے کہ بھارتی بی ایس ایف کارندہ غاک ایل او سی و ورکنگ باؤنڈری آ امن ءِ لتاڑنگ نا ارادہ اٹ ورکنگ بانڈری ءِ عبور و مارٹر گولہ فائر کرسا جارحانہ رویہ نا درشانی ءِ کرینے۔ وزارت خارجہ پارے کہ دابھارت نا کنڈآن ڈی جی ایم اوز نا 2021نا معاہدہ نا اولیکو سنگین خلاف ورزی ءِ۔ وزارت خارجہ بھارتی ہائی کمیشن ءِ پارینے کہ او بھارت اٹ تعلقدار کمامدارآتون رابطہ کرسا ڈی جی ایم اوز نا 2021ء نا معاہدہ غا عمل درآمد نا بارواٹ بی ایس ایف کارندہ غاتا غیر مناسب رویہ ظاہر مریک۔ اسلام آباد اٹی سیاسی جاچکار آک پارینو کہ مودی حکومت بھارت اٹ کورونا نا جہانی دین اتون مون تننگ اٹ بے سہبی آن چکار ءِ اسہ کنڈ کننگ کن فالس فلیگ آپریشن کون ءُ مہم جوئی اس کننگ کیک و جنگ بندی نا دا خلاف ورزی آن بھارت نا دا جارحانہ عزم انا عکاسی مریک۔ جاچکار آک پارینو کہ بھارت درو مچ آ دے ضلع سانبہ نا رام گڑھ سیکٹر آ پاکستان نا کنڈآن جنگ بندی نا خلاف ورزی نا دروغ انا خبر چلیفسا کرے ہراڑآن کورونا تنکی تون مون تننگ اٹ بھارتی حکومت نا ہبکہ ئی مریک۔