پارلیمانی کشمیر کمیٹی کشمیری دودوربیدگ نا مون آ دننگ و رکھ اکن کاریم کننگ ءِ، پارلیمانی کشمیر کمیٹی نا چیئرمین شہریارآفریدی نا گپ وتران

اسلام آباد۔ 03 مئی (اے پی پی) پارلیمانی کشمیر کمیٹی نا چیئرمین شہریار آفریدی پارینے کہ ہراتم آن بھارت کشمیری شناخت و دودوربیدگ ءِ چٹفنگ خواہسونے ہموتم آن کشمیر کمیٹی دودوربیدگ نا مون آ دننگ و رکھ اکن کاریم کننگ ءِ، نن کشمیری تا حقی شناخت نا مون آ دننگ کن چاہندار آتیا کاریم ہلنگ اُن، دارداٹ جوڑ مروک آ بورڈ پنی آ اداکارہ، دانشور، فلم ساز آتیا تالان ءِ ہرابھارت نا کنڈآن بھس کروک آ کشمیری دودوربیدگ نا بحالی و تشہیر کن کمک کیک، پارلیمانی کشمیر کمیٹی اولیکو وار کشمیر آ پوسکن ءُ بیانیہ اس ٹہیفنگ نا غرض اٹ اہم گام گیج کرینے ہرافتے ٹی چندی ایڈوائزری بورڈ اکن ٹرمز آف ریفرنس (ٹی او آرز) ءِ حتمی دروشم اس تننگانے، ہر ایڈوائزری بورڈ 12 باسک آتیا تالان مریک و دانا پنداری ءِ پارلیمان کیک، کمیٹی نا پوسکن آ ویب سائٹ ءِ کشمیر نا جھیڑہ غا معلومداری آن پُر و داڑتون چندی بولی تیٹی مٹ و بدل آ تالان تخنگک۔ اے پی پی تون گپ وتران کرسا اوپارے کہ ہر ایڈوائزری بورڈ انا ماہانہ دیوان مریک و او غٹ ایجنڈا نا ٹک آتیان مین کمیٹی ءِ معلومدار کیک۔ دا بورڈ انا دیوان مچ آ ملک اٹی مریک۔ غٹ جہانی فورم تیا کشمیر نا ویل ءِ چست کننگ کن کشمیر کمیٹی نا منظم و فعال ایکشن پلان اس ہم جوڑ کننگ انگ ءِ۔ کشمیر آ غٹ پڑتیا فعال کڑد ادا کننگ کن کمیٹی ٹی ذیلی کمیٹی ٹہیفنگ آ ہم سجفنگ انگءِ۔ کمیٹی ءِ روایتی کسر آن بدل کرسا اسہ بیانیہ اس جوڑ کننگ انگ ءِ۔ ڈیجیٹل دنیا ٹی بریبری نا کڑد ءِ پک کننگ کن کمیٹی پاکستان ٹیلی کمیونیکیشن اتھارٹی تون اواری اٹ کاریم کننگ ءِ۔ شہریار آفریدی پارے کہ انفارمیشن ٹیکنالوجی نا چاہندارآتون اواری اٹ اسہ ایڈوائزری بورڈ اس جوڑ کننگ انگ ءِ تانکہ ڈیجیٹل پڑآہم سرگرم کڑد ادا کننگ مرے۔ کشمیر نا بیانیہ کن پوسکن آ مقاد و پٹ وپول کن اسہ تعلیم نا چاہندار اسے آ تالان ایڈوائزری بورڈ اس جوڑ کننگ انگ ءِ۔ کشمیر آ دودوربیدگی ایڈوائزری بورڈ اس ہم جوڑ کننگانے داٹی صف اول نا اداکار، فنکار و فلم ساز آتے اوار کننگانے۔