اسلام آباد۔1مئی (اے پی پی): مزن وزیر عمران خان ءَگشتگ کہ اسلام ءَ چاگردی انصاف ءِ رھبند ءُ پوریاگرانی حقانی دیئگ ءِ سرءَ حاسیں زور پر داتگ، انوگیں حکومت ءَ پہ پوریاگراں ءُ آیانی حانداناں لوگءُ جاہ، وانگ ءُ زانگ ءُ جانءُ سلامتی ءِ آسراتی سرکنگ ءُ آیانی زندماناں جوان کنگ ءِ جزم کتگ۔ حکومت کورونا ءِ ہوپ ءِ سوب ءَ پوریاگر ءُ حاس روزانداری مُز ءِ سرءَ کارکنوکانی جیڑہءُ جنجالاں چہ سرپد اِنت ءُ کم کٹءُ کمائی کنوکیں پوریاگرانی ھاترءَ حکومت ءَ “مزدور کا احساس” بزاں پوریاگرانی جیڑہ آنی مارگ ءِ ھاترءَ پروگرام بندات کتگ۔ اے ھیالانی درشانی آئی ءَ پوریاگرانی میاں اوستمانی روچءِ موہءَ وتی کلوہ ءَ کتگ۔ پریس انفارمیشن ڈیپارٹمنٹ( پی آئی ڈ) ءِ نیمگ ءَ چہ جاری بیان ءِ ردءَ مزن وزیر ءَگشتگ کہ یکم مئی مارا ہما کارکن ءُپوریاگرانی قربانی، بہادری ءُ جزم ءِ یات ءَ گیج ایت کہ آیاں وتی بنکی حقانی رکینگ ءِ ھاترءَ کار کتگءُ وتی جان ندر کتگ اَنت ۔ مزن وزیر ءَ دعا کتگ کہ اللہ تعالیٰ مارا وتی کارکن ءُ ملک ءِ وشھالی ءِ ھاترءَ گہتریں کوشست کنگ ءِ توفیق ءَ بہ دنت۔
