اسلام آباد۔ 29 اپریل (اے پی پی) وزیراعظم عمران خان پارینے کہ 90 لکھ پاکستانی پردیسیک ننا میرات ءُ، سعودی عرب اٹی پاکستانی سفارت خانہ و سفیر نا کنڈآن پردیسی تا خیال ءِ تخپننگ و پیسہ ہلنگ نا غاوتا جاست وپاست ءِ کرفسا داٹی اوار زموار آتا برخلاف سخت کارروائی کینہ، ہراتم اسکان ملکی برآمد آتے ٹی ودکی مفک ہمووخت اسکان پردیسیک دا خلیج ءِ مر کننگ اٹ کمکار مننگ کیرہ، تینا خاہوت آتیان چندی چندی سال مر مرسا محنت مزوری کرسا تینا وطن آ ترسیلات زر مون تروک آ پردیسیک ننا محسن ءُ، ننا سفارت خانہ غاتا کنڈآن اوفتا بایدے ستاءِ کننگے۔ پنچ شنبے نادے آ اسلام آباد اٹی روشن ڈیجیٹل اکاؤنٹ نا دود آن تران کرسا اوپارے کہ روشن ڈیجیٹل اکاؤنٹ چنکو وخت اسے ٹی اسہ ارب ڈالر نا اہم ءُ مزل اس عبور کرینے، داڑآ رضا باقر و اونا ٹیم ءِ مبارکبادی ایتنہ، دادے پین مون آ دننگ و پردیسی تیکن روشن ڈیجیٹل کار و راجی خذمت ہم سرسہب مریک۔ اوپارے کہ 90لکھ پاکستانی پردیسی پیشن نا ملک آتے ٹی ءُ، اگہ دافتیان نن 20 لکھ اسکان ہم سرمسن تو دا اکاؤنٹ پین ودنگ کیک۔ داڑکن مارکیٹنگ آ سجفن و وزیر خزانہ شوکت ترین نا مارکیٹنگ نا بشخ اٹی چاہنداری آن فائدہ ہرفنہ۔ پاکستان نا ویل دادے کہ داڑے کس اس تینا برآمد آتے ودفنگ آ سجفتو، مریس مدی ڈٹ بندی نا کمتی ہم ننا المیہ مسنے، 30 سال اٹی ڈالر نا کمتی و برآمد کم مننگ نا سوب آن 20 وار جہانی مالیاتی فنڈ آ ہنوئی تما۔ ہراتم اسکان ننا برآمد آک ودپسہ ننے اوورسیز پاکستانی تیا سیبو کروئی مریک۔ وزیراعظم پارے کہ شوکت ترین ہرا اولیکو وزیر خزانہ ئس ہموتم او ترسیلات زر ودفنگ کن کاریم کرے داسہ دا ارٹ میکو وار مننگ ءِ۔ وزیراعظم پارے کہ اُراتیکن لس بندغ ءِ وام انا فراوانی بینک آتا عادت آخا، ہزگار بندغ ءِ دا آسراتی آرام اٹ ملک، ہنداخاطرآن بینک آتے تینا عملہ نا تربیت نا گرج ءِ۔ اوپارے کہ تعمیراتی بشخ اٹی بھلو گچینی اس بسنے۔ اسہ سال اٹی ریکارڈ ترسیلات زر بسنے و مستین نا غٹ ریکارڈ آک پنانو، ولے دا کم ءِ، ننے داکنڈآ پین چکار کروئی مریک۔ کرنٹ اکاؤنٹ نسخان آن روپئی آ زور تمک داڑآن شرح نمو و پیشن نا زرکاری ہم زہمی مریک۔ روشن ڈیجیٹل اہم پروگرام اسے، بینک آک ہراوڑنن تون تفینو اونا ستاءِ کینہ، ننے ہاؤسنگ نا بشخ اٹی بینک آتا بھا ز بھلو کڑد اس درکار ءِ، پاکستانی پردیسی تا کنڈآن ترسیلات زر اکن اوفتا کڑد درکار ءِ، پردیسیک ننا میرات ءُ، داٹی خواری کش تپہ خصوصی وڑاٹ ننا میرات ءُ، ای اوفتے ہمووخت آن چاوہ ہراتم لندن اٹی کرکٹ کریٹہ ہموتم آ دا خواری کش تپہ غٹ آن زیات ننا است بڈی ءِ کریکہ۔ اوپارے کہ بدبختی اٹ ننا سفارت خانہ غاک ہمووڑ دا خواری کش آتا ستاءِ کپسہ ہراوڑاوفتا ستاءِ کروئی ئس۔ دااسہ اسہ کمرہ ٹی پنچ آن ہفت بندغ رہینگسا و اوورٹائم خلسا محنت مزوری کرسا تینا کاہوت آتے پیسہ گدریفرہ، داننکن خصوصی بندغ ءُ، نن اوفتے نوکری تننگ کتون، دا کیہی کیہی سال تینا خاہوت آن مر مریرہ، کنا سفارت خانہ غاتے دا کلہو ءِ کہ اوفتا خیال ءِ تخر، دا نما غٹ آن اہم زمواری ءِ۔ وزیراعظم پارے کہ سعودی عرب اٹی ننا سفارت خانہ تینا خواری کش تپہ نا ہموخیال ءِ تختو ہراوڑ تخوئی ئسک و اوفتا کمک ءِ کننگ نا جاگہ غا اوفتیان پیسہ ہلنگ نا ہم غاو ارے، دانا انکوائری ءِ کرفنگ اُن، ہموڑے تعینات سفیر نا ہم جاست وپاست مریک، داکان ودکی عملہ ءِ پدی بٹنگ انگ اُن، ہرکس کہ داٹی اوار مس اونا برخلاف کارروائی کینہ، و مثالی ءُ سزا ایتنہ۔ وزیراعظم گورنر اسٹیٹ بینک رضاباقر نا خذمت آتاستاءِ کرسا پارے کہ اومیت ءِ کہ دا چرجوئی ہنداوڑ برجاسلک۔
