اسلام آباد۔ 29 اپریل (اے پی پی) وزیر خارجہ شاہ محمود قریشی پارینے کہ اوغانستان اٹی امن آن ڈیہہ ٹی رابطہ غاتے مون آ دننگک و شونداری و شونہالی نا دوئی کننگ ممکن مننگ کیک۔ نن اوغان سرکڑدہ غاتے ٹی، اوغان تے قابل قبول جامع مذاکرات نا کمک اٹ اوغان ویل انا دیرپا و آخبتی سیاسی ایسری نا خواہندار اُن۔ داہیت آتے او پنچ شنبے ناد ے آ پاکستان نا دورہ غا بروک آ جرمنی نا وزیر خارجہ ہائیکو ماس اتون اوڑدہی ٹی پارے۔ داکان مست جرمن وزیر خارجہ پاکستان نا سرکاری دورہ غا پنچ شنبے نادے آ اسلام آباد آ سرمس۔ وزارت خارجہ غا بننگ آ وزیر خارجہ مخدوم شاہ محمود قریشی شرفمند آ مہمان ءِ بخیر کرے۔ دفترخارجہ نا رداٹ ہڑتوم آ وزیر خارجہ غاتا نیام اٹ وزارت خارجہ ٹی اوڑدہی ٹی کرونا دینی چیلنج، ہڑتوم آ کنڈآتا تعلقداری، ڈیہہ نا حالیت، اوغان امن عمل تون اوار تین پہ تینی است خواہی نا چندی باندات آتیا گپ وتران مس۔ شاہ محمود قریشی پارے کہ برلن اٹی ہراتم کنا جرمن ہم منصب ہائیکو ماس تون اوڑدہی مس تو ہڑتوم آ کنڈآتا تعلقداری آ ننا نیام اٹ سرجم گپ وتران مس۔ جرمن وزیر خارجہ اوغانستان آ ہِننگ آن مست المی تکا کہ او پاکستان نا نکتہ نظر ءِ چائے۔ نن امریکی صدر جوبائیڈن انتظامیہ نا کنڈآن اوغانستان آن فوج انا کشنگ نا پڑو آن پد ودی مروک آ حالیت آتیا سرجم گپ وتران کرین۔ شاہ محمود قریشی پارے کہ پاکستان، اسہ پرامن و سوگو اوغانستان اسے نا خواہندار ءِ۔ اوغانستان اٹی امن آن ڈیہہ ٹی رابطہ غاتے مون آ دننگک و شونداری و شونہالی نا دوئی کننگ ممکن مننگ کیک۔ اوپارے کہ نن اوغان سرکڑدہ غاتے ٹی، اوغان تے قابل قبول جامع مذاکرات نا کمک اٹ اوغان ویل انا دیرپا و آخبتی سیاسی ایسری نا خواہندار اُن۔ پاکستان، اوغان امن عمل تون اوار ڈیہہ ٹی امن کن تینا خیرخواہی نا کوشست آتے برجاتخک۔ وزیر خارجہ کورونا دینی حالیت آتے ٹی جرمن ہم منصب نا دورہ پاکستان نا ستاءِ کرے۔ وزیر خارجہ پاکستان ءِ کرونا ویکسین نا ودکی خور گدریفنگ آ جرمن وزیر خارجہ نا منت واری ءِ ہرفے۔
