اسلام آباد۔ 29اپریل (اے پی پی) وزیر خارجہ مخدوم شاہ محمود قریشی تون پاکستان اٹی تعینات ہنگری نا سفیر بیلافزیکاس پنچ شنبے نادے آ وزارت خارجہ ٹی اوڑدہی کرے۔ اوڑدہی ٹی ہڑتوم آ کنڈآتا تعلقداری، چندی بشخ آتے ٹی ہڑتوم آ کنڈآتا کمکاری تون اوار تین پہ تینی است خواہی نا باندات آ گپ وتران کننگا۔ داوخت آ ہنگری نا وزیر خارجہ نا گمانی دورہ پاکستان نا بست وبند آتا بابت ہم گپ وتران مس۔ وزیر خارجہ پارے کہ پاکستان، ہنگری تون تینا تعلقداری تے خاص اہمیت ایتک۔ کورونا نا دین انا چیلنج آن پد ہم ہڑتوم آ ملک آتا نیام اٹ ودوک آ ہڑتوم آ کنڈآتا واپار، زرکاری و اقتصادی کمکاری ستاکڑزک۔ داوخت آ پاکستان و ہنگری نا نیام اٹ آرٹ اینڈ کلچر نا بشخ اٹی ہڑتوم آ کنڈآتا کمکاری نا مون آ دننگ نا بابت ہم گپ وتران مس۔ ہنگری نا سفیر بیلافزیکاس وزیر خارجہ نا منت واری ءِ ہرفسا پاکستان و ہنگری نا نیام اٹ ہڑتوم آ کنڈآتا واپاری و اقتصادی تعلقداری تا مون آ دننگ کن تینا ہرممکن کمکاری نا باوری کرفے۔
