اسلام آباد۔ 29اپریل (اے پی پی) بنجائی وزیر حوالکاری و شینکاری چوہدری فواد حسین پارینے کہ بروک آ ہفتہ وزیراعظم عمران خان نا دورہ سعودی عرب ہڑتوم آ کنڈآتا تعلقداری تے پین سوگو کننگ اٹ کمکار مریک وزیراعظم عمران خان سعودی عرب اٹی پاکستانی سفارت خانہ نا برخلاف غاوتا نوٹس ءِ ہلسا سعودی سفیر ءِ مدت پورو وخت اس کہ ایلو 6 سفارتی عملہ ءِ پدی بٹنگ انگانے، اوفتا برخلاف جاست وپاست نا بناءِ کننگانے، مچ آ دنیا ٹی پاکستان نا سفارت خانہ غاتے کن وارننگ ءِ کہ او اوورسیز پاکستانی تا خذمت و آسراتی فراوانی ءِ پک کیر ایلودروشم اٹ اوفتا برخلاف ہم ہنداوڑ کارروائی کننگک، پاکستان نا سلہہ بند فوج و سیکورٹی فورس آک مہالو ہم فضل الرحمان نا سنگت آتے شکست تسنو داسہ ہم پاکستان نا دفاع کن سیکورٹی فورس آک الس نا مخ تف و تائید اٹ سیسہ پلائی دیوال اس مریرہ۔ او پنچ شنبے نادے آ داڑے گورنر سندھ عمران اسماعیل تون اوڑدہی آن پد صحافی تتون گپ وتران کریکہ۔ بنجائی وزیر چوہدری فواد حسین پارے کہ گورنر سندھ ءِ وزارت حوالکاری و شینکاری نا دورہ کننگ آ منت واری ءِ ہرفنہ اینو نادے بھاز اہم ءِ کراچی نا حلقہ این اے 249 نا بابت غٹ سرویک پاننگ ءُ کہ اینو نادے پاکستان تحریک انصاف نا دے ءِ پی ٹی آئی کراچی و سندھ تنظیم نا اسیجائی کوشست آتے اٹ سندھ انا الس غٹ ویل آتا ایسر پی ٹی آئی ءِ تکنگ ءِ۔ اوپارے کہ وزیراعظم عمران خان نا کماشی ٹی حکومت پوسکن آ پاکستان نا قول انا پوروی کن کاربند ءِ۔ اوپارے کہ اوورسیز پاکستانیز وزیراعظم عمران خان نا است آن بھاز خڑک ءُ سعودی عرب اٹ پاکستانی سفارت خانہ ٹی سفارتی عملہ نا کنڈآن آسراتی تا عدم فراوانی و رشوت نا غاو آ وزیراعظم سخت نوٹس ہلکونے و سعودی عرب نا سفیر ہرانا مد پورو مسوسس تون اوار 7 سفارت کار آتے پاکستان آ پدی بٹنگسا اوفتا برخلاف جاست وپاست نا بناءِ کننگانے سفارت خانہ غاک اسہ پردیسی تے آسراتی و المی خذمت تننگ کپسہ تو اوفتا سفارت خانہ غاتے ٹی ہچ ءُ ضرورت اس اف۔ بنجائی وزیر چوہدری فواد حسین پارے کہ مولانا فضل الرحمان نا داہیت کہ نن اسہ تُو اس ہم جنگ کننگ کپنہ دااوفتا غلط گمانی ءِ طالبان تا بارواٹ ہم او پاریکہ کہ او اسلام آباد آن خڑک سرمسنو پاکستان نا فوج و سیکورٹی فورس آک تو مولانا فضل الرحمان نا دوست آتا ہم مقابلہ ءِ کریر و اوفتے شکست تسر داسہ ہم پاکستان نا فوج و سیکورٹی ادارہ غاک پاکستان نا دفاع کن سوگو ءُ دیوال ءُ۔ اسہ سوج اسے نا ورندی ٹی چوہدری فواد حسین پارے کہ این سی او سی نا کنڈآن 20 ضلع غاتے ٹی لاک ڈاؤن نا نوٹیفکیشن جعلی ءِ اونا تردید ءِ کننگانے۔ اوپارے کہ داوخت آ لاہور اٹی کورونا دین انا کچ 22.5درسد ءِ وخت اس کہ مچ آ ملک اٹی جم وڑاٹ کورونا دین انا کچ 11.50درسد ءِ اگہ دا کچ 14یا 15 درسد اسکان کاہک تو ولدا لاک ڈاؤن آن بیدس ہچ ءُ پین آپشن اس اف۔ اوپارے کہ این سی اوسی اسہ دستاویز اس تیار کننگ ءِ ہراٹی لاک ڈاؤن نا تشریح ہم مریک و المی آ گڑاتا فراوانی ءِ ہم پک کروئی مریک۔ اسہ سوج اسے نا ورندی ٹی اوپارے کہ وزیراعظم بروک آ ہفتہ سعودی عرب نا دورہ ءِ کننگ والا ءِ دا دورہ پاکستان و سعودی عرب نا نیام اٹ ساڑی تعلقداری تے پین سوگو کننگ نا معاشی کمکاری ٹی ودکی کن کمکار مریک۔
