بیجنگ۔ 29 اپریل (اے پی پی) چین اٹی پاکستان نا سفیر معین الحق پارینے کہ ورناک ایشیائی ڈیہہ ٹی امن،شونداری و شونہالی ٹی پبی کڑد ادا کیر۔ چینی ریڈیو نا رداٹ پیشن نا ملک آتون دوستانہ رابطہ غاتا مون آ دننگ تون وابستہ چینی انجمن نا کنڈآن دہ می چین۔ سویلی ایشیاانٹرنیشنل کلچر فورم نا رداٹ یوتھ کلچر سیلون اس اڈتننگا۔ پاکستانی سفیر معین الحق دود آن تران کرسا پارے کہ متکن انگا وخت آتیان ایشیاسیاسی، زرگزرانی و دودوربیدگی سرجزآتا مرکز مسنے۔ اینو 21 می صدی ءِ ایشیانا صدی گوندنگک و جہانی کہول آ ایشیا نا ودوک آ اثرورسوخ بھاز اہمیت تخک۔ 2050اسکان ایشیا نا شمار دنیا نا نمان انگازرگزرانی واک آتے ٹی کننگک۔ اوپارے کہ کورونا دین انا دینی حالیت آتے ٹی ہم ایشیائی ڈیہہ زرگزرانی بحالی نا عمل اٹ کلیدی کڑد ادا کیک وخت اس کہ چین دین ءِ سرسہبی اٹ شکست تننگ آن پد اقتصادی بحالی ناعمل اٹ قائدانہ کڑد ادا کننگ ءِ۔ معین الحق مستی پارے کہ پاکستان تینا یکتا جغرافیائی خدوخال نا سوب ڈیہہ ٹی فنون، فلسفہ و دودوربیدگ نا مون آ دننگ اٹ پیش پیش ءِ۔ پاکستانی ورناک دودوربیدگی رابطہ غاتے مون آ دننگ تون اوار ڈیہہ ٹی امن و شونداری ءِ مون آ دننگ ءُ۔
