اسلام آباد۔ 29 اپریل (اے پی پی) ہنگری نا وزیر امور خارجہ و واپار پیٹر سیجارٹو تینا پاکستانی ہم منصب شاہ محمود قریشی نا سلہ غا 30اپریل آ جمعہ نادے آ پاکستان نا سرکاری دورہ ءِ کیک۔دفترخارجہ نا رداٹ وزیر خارجیہ سیجارٹو اتون اسہ بڑزکو کہولی کاروباری ڈل اس ہم مریک ہراٹی 20 آن زیات سرکڑدہ کاروباری بندغ اوار مریرہ۔ ہنگری نا وزیر خارجہ، شاہ محمود قریشی تون ون آن ون اوڑدہی آن بیدس ڈل آتا کہول آ گپ وتران ہم کیک۔ گپ وتران اٹی ساڑی آ ہڑتوم آ کنڈآتا تعلقداری نا جاچ ءِ ہلنگک و تعلقداری تیٹی پین پش رفت خاص وڑاٹ ہڑتوم آ کنڈآتا واپار، زرگزران، کشاری پٹ وپول و فوڈ انڈسٹری، ماحولیات نا صنعت تون اوار فضلہ و آبی وسیلہ غاتا انتظام، سائنس و انجینئرنگ ٹیکنالوجی، و بڑزکو تعلیم اٹ کمکاری ءِ ودفنگ نا بابت باندات آ شرہ مریک۔ ہڑتوم آ وزیر خارجہ غاک علاقائی و جہانی باندات آہم گپ وتران کیرہ۔ ہڑتوم آ وزیر خارجہ غاک اسیجائی وڑاٹ پاکستان ہنگری اقتصادی ڈپلومیسی نا دود آن تران کیرہ ہراٹی ہنگری نا کاروباری ڈل آن بیدس پاکستانی کمپنی تا نمائندہ ہم بشخ ہلیک۔ ہڑتوم آ وزیر خارجہ غاک، تدوک آ تُو، ہنگری پاکستان واپاری و اقتصادی ونڈو نا عملی وڑاٹ بناءِ کریسر۔ ہراٹی ہڑتوم آ کندآتا 100 آن زیات کمپنیک بشخ ہلکوسر۔ ہنگری نا وزیر امور خارجہ و واپار نا دورہ پاکستان، کثیر الجہتی ہڑتوم آ کنڈآتا تعلقداری تے سوگو کننگ و علاقائی و جہانی امور آ افہام و تفہیم ءِ ودفنگ اٹ مثبت کڑد ادا کیک۔
