اسلام آباد۔ 29اپریل (اے پی پی) چین پاکستان اقتصادی راہداری ڈٹ انا رداٹ ملک انا تہہ ٹی خصوصی اقتصادی زون جوڑ کننگ انگ ءِ ہراڑآن پیدواری لائخی، واپاری سرجزو پاکستانی برآمد آتے ٹی ودکی مریک، ہنداوڑ ملک انا راجی و اقتصادی شوندساری کن قوت محرکہ فراوان مریک۔ زرکاری بورڈ انا کمامدارآتا رداٹ ودوک آ ٓبادی کن روزگار نا وارخواہی ودی کننگ کن صنعت آتا مون آ دننگ و شونداری بھاز اہم ءِ انتئے کہ صنعت آتے ٹی نئے بیرہ مخلوق نا اسہ بھلو کچ اسے روزگار ملک بلکن داڑتون اوار صنعت تون گنڈوک ایلو سرجزآتا کمک اٹ ہم مخلوق نا بھلو کچ اس روزگاری مریک۔ ہنداوڑ پاکستان اٹی صنعتی شونداری آن دا ویل انا مون ءِ توننگ مریک۔ اوپارے کہ چین نا صنعتی شونداری تینا مٹ تینٹ ءِ ہرا چین نا جم شونداری ٹی اہم ءُ کڑد اس ادا کرینے۔ السی جمہوریہ چین نا صنعتی شونداری ٹی اسپیشل اکنامک زون تا کڑد بھاز اہم ءِ، اومیت ءِ کہ سی پیک نا رداٹ پاکستان چین نا صنعتی شونداری نا ماڈل آ تینا صنعت ءِ شون ایتک ہراڑآن ملکی زرگزران سوگو و السی شونہالی ٹی ودکی مریک۔
