اسلام آباد۔ 29اپریل (اے پی پی) بنجائی وزیر مذہبی امور پیر نورالحق قادری پارے کہ عالم دینک کورونا دین انا مسٹ میکو ریسہ غان بچنگ و ایس او پی تیا گچین عملدرآمد کن حکومتی کوشست آتون تفر۔ وزارت مذہبی امور سلابتی عمل ءِ برجاتخک و عالم دین تا سلاہ تے وزیراعظم عمران خان اسکان سرکیک۔ داہیت ءِ بنجائی وزیر مذہبی امور پیر نور الحق قادری پنچ شنبے نادے آ وزارت مذہبی امور اٹی اسہ دیوان اسے نا کماشی ءِ کرسا پارے۔ دیوان اٹی 21 روچہ مبارک آ یوم شہادت حضرت علی ؓ نا دود آتا بابت شیعہ عالم دین آتون سرجم سلابت کننگا۔ دیوان اٹی اسلام آباد آن چیئرمین اسلامی نظریاتی کونسل ڈاکٹر قبلہ ایاز، وزارت داخلہ، این سی او سی و مذہبی امور نا شعبہ تحقیق و مراجع نا نمائندہ غاک بشخ ہلکر وخت اس کہ لاہور، کراچی و کوئٹہ نا صوبائی محکمہ اوقاف نا دفترآتیان ایلو کمامدار و شیعہ عالم دینک ویڈیو لنک انا کمک اٹ دیوان اٹی بشخ ہلکر۔
