اسلام آباد۔ 28 اپریل (اے پی پی) وزیراعظم عمران خان داہیت انا درشانی ءِ کرینے کہ پولیو نا چٹفنگ حکومت نا اولیت ءِ، کوویڈ۔ 19 نا بابت چیلنج آتیان پد ہم مچ آ ملک اٹی انسداد پولیو مہم ءِ ترند کننگ نا کوشست آک برجاءُ۔ کم کٹیا کروک آ ملک آتے مساوی، وخت آ و بھلو کچ اسے آ کوویڈ۔ 19 ویکسین نا فراوانی نا گرج ءِ۔ وزیراعظم عمران خان چارشنبے نادے آ بل اینڈ میلنڈا گیٹس فاؤنڈیشن نا شریک چیئرمین بل گیٹس اتون ٹیل فون آ رابطہ کرے۔ گپ وتران اٹی کوویڈ۔ 19 نا دین انا تازہ حالیت، پولیو نا چٹفنگ نا مہم، جان جوڑی، شونداری امور و چاگڑدی بدلی تیا گپ وتران کننگا۔ وزیراعظم مچ آ دنیا ٹی کوویڈ۔ 19 نا دین و بے بریبری نا مقابلہ ءِ کننگ و نیزگاری نا برخلاف جنگ اکن بل اینڈ میلنڈا گیٹس فاؤنڈیشن نا کاریم نا ستاءِ کرے۔ موسمیاتی بدلی نا بابت گیٹس ءِ نوشتہ کروک آ تینا ساڑی آ چھٹی نا ذکر ءِ کرسا وزیراعظم بل گیٹس ءِ پاکستان نا اہم ڈٹ آتا بارواٹ معلومدارکرے ہرافتے ٹی 10 بلین ٹری سونامی ہم اوار ءِ۔ بل گیٹس موسمیاتی بدلی تون مون تننگ کن پاکستان نا عزم انا اعتراف و داہیت آ امنا کرے کہ دنیا ءِ دا جہانی چیلنج نا مقابلہ کننگ کن یکجا مروئی مریک۔ اوجہانی راہشون تیا زور شاغا کہ غذائی رکھ اکن اوفتے کشاری پٹ وپول اٹ زرکاری ءِ اولیت تننگے۔ اووزیراعظم عمران خان ءِ داہم سلاہ تس کہ چنکا بزغر آتے کن جہانی کمکاری ءِ ودفنگ نا غرض اٹ شعور تالان کننگ کن پاکستان نا یکتا توار ءِ کاریم اٹ اتنگے۔ کوویڈ۔ 19 ویکسین اسکان بریبر رسینگ کن گیٹس فاؤنڈیشن نا پبی وکالت نا ستا ءِ کرسا وزیراعظم کم کٹیا کروک آ ملک آتے ٹی ویکسین نا مساوی و وخت آ فراوانی نا اہمیت آ زور شاغا۔ وزیراعظم عمران خان و بل گیٹس پاکستان اٹی کوویڈ۔ 19، پولیو و ایلو ناجوڑ ی تا تالانی ءِ دمدستی وڑاٹ توننگ نا اہمیت آ امنا کرے۔ وزیراعظم پارے کہ پولیو نا چٹفنگ حکومت نا اولیت ءِ، و کویڈ۔ 19 نا بابت چیلنج آتیان پد ہم مچ آ ملک اٹی انسداد پولیو مہم ءِ ترند کننگ نا کوشست برجاءِ۔ وزیراعظم پولیو آن پاک پاکستان نا دوئی کننگ کن مچ آ ملک اٹی کوشست آتے سوگو کننگ نا تینا عزم انا درشانی ءِ کرے۔ گیٹس فاؤنڈیشن نا پاکستان اٹ سوگو شریداری ءِ۔ وزیراعظم و بل گیٹس اسیجائی مسخت آتیا اواری اٹ کاریم ءِ برجاتخنگ آ امنا کریر۔
