کوئٹہ۔ 28اپریل (اے پی پی) وزیراعظم عمران خان پارینے کہ مستین اٹ بلوچستان ءِ غٹ آن زیات گوجالنگا دانا خاص سوب دائس کہ بنجاٹی حکومت جوڑ کننگ کن بلوچستان ناوونٹ آتا کچ کم ئس، اسلام آباد اٹی جوڑ مروک آ وزیراعظم ءِ بلوچستان نا وونٹ آتون سروکار الوکہ و پاور سنٹر ءِ بلوچستان نا گرج الوکہ ننا حکومت داسوچ ءِ بدل کرسا بلوچستان تون اوار پسماندہ علاقہ غاتا شونداری آ خاص چکار کرے و مشکل زرگزرانی و مالی حالیت آتیان پد ہم شونداری عمل آ عملدرآمد ءِ پک کرے۔ داخیال آتا درشانی ءِ او چارشنبے نادے آ داڑے کوئٹہ ویسٹرن بائی پاس، ڈیرہ مراد جمالی بائی پاس، زیارت موڑ، کچ، ہرنائی، سنجاوی روڈ انا تفنگ نا بنداو ءِ تخنگ نا بنائی دود آن تران کرسا کرے۔ داوخت آ چیئرمین نیشنل ہائی وے اتھارٹی کیپٹن (ر) محمد خرم آغا وزیراعظم ءِ بلوچستان اٹی این ایچ اے نا برجا ڈٹ آتا بابت حوال تس۔ دود اٹی بنجائی وزیر مواصلات مراد سعید، بنجائی وزیر پلاننگ اسد عمر خان، بنجائی وزیر دفاعی پیداوار زبیدہ جلال، ڈپٹی اسپیکر قومی اسمبلی قاسم خان سوری، گورنر بلوچستان امان اللہ خان یاسین زئی، وزیر اعلیٰ بلوچستان جام کمال خان، کمانڈر سدرن کمانڈ لیفٹیننٹ جنرل سرفراز علی، صوبائی وزیر آک، سینیٹر آک و صوبائی اسمبلی نا باسک آک و قومی اسمبلی ہم ساڑی ئسر۔ وزیراعظم عمران خان پارے کہ داہیت ستاکڑزک کہ بلوچستان اٹی تدوک آ دونیم سال اٹی 3300کلومیٹر شاہراہ تا تفنگ نا ڈٹ اس ٹہیفنگا و داڑآ بے تاخیر آن عملدرآمد نا بناءِ کننگا مستین نا پانزدہ سال آتے ٹی بلوچستان اٹی بیرہ یانزدہ سد کلومیٹر شاہراہ تا تفنگ نا ڈٹ بندی کننگا اوپارے کہ اینو بناکروک آ مسہ اہم ڈٹ آتیان بیدس چمن کوئٹہ کراچی دورویہ شاہراہ نا بناءِ ہم زوت کننگک وزیراعظم بنجائی وزیر مراد سعید و محکمہ مواصلات ءِ پارت کرے کہ بلوچستان اٹی برجا ڈٹ آتے بڑزکو آب انا رداٹ ایسر اسکان سرکننگے تانکہ مخلوق دیرپا وڑاٹ دافتیان فائدہ ہرفسا ننا حکومت نا کارکڑدگی ءِ یات تخر۔ اوپارے کہ 2013ء ٹی ننے خیبرپختونخواٹی مشکل حالیت آتے ٹی حکومت رسینگا 500 پولیس کارندہ شہید ئسر پولیس نا مورال بھاز نزور ئس برمتہ تاوان، دہشت گردی، لٹ وپل عروج آ ئس اپوزیشن تنقید کریکہ کہ خیبرپختونخوا ٹی پوسکن آ پاکستان اسہ جاگہ اس ہم نظر بفننگ ءِ نن صبر و تحمل و سگ اٹ تینا نظریہ نا رداٹ کاریم ءِ برجاتخان و کارکڑد نا بنداو آ 2018ء نا گچین کاری تیٹی ننے اِراتہائی اکثریت تس۔ اوپارے کہ ننا نظریہ خذمت خلق ءِ، دنیا ٹی اختہ مروک یا اثرورسوخ نا مخ تف شخصیت بادشاہ تے یات تخنگپک بلکن الس نا خذمت ءِ کروک آتے مدام یات تخنگک اینو گنگارام آخا ولے اونا طبی ادارہ اودے زندہ کرینے وزیراعظم عمران خان پارے کہ ملک اٹی اسہ چنکو تپہ اس وسیلہ غاتیا کوزہ گیر ءِ ہرا غریب آتیان وسیلہ غاتے تینا کنڈآ چکک دا چنکاتپہ تون داخہ پیسہ ارے کہ کیہی ملک اوفتا مقابلہ ءِ کننگ کپسہ، لندن اٹی پاکستانی سیاستدان تا دا کبین آ علاقہ غاتے ٹی جائیداد آک ءُ ہراڑے برطانیہ نا وزیراعظم ہم پراپرٹی ہلنگ کپک، اوپارے کہ ننا حکومت خیبرپختونخوا و ولدا پنجاب اٹی ہیلتھ انشورنس کارڈ انا رداٹ غریب آتے جان جوڑی نا آب اٹ آسراتی فراوان کرے و داسہ نن غٹ صوبہ غاتا ہر بندغ ءِ ہیلتھ انشورنس کارڈ تننگ اُن دا چرجوئی ٹی ہرخاہوت ءِ دہ لکھ روپئی اسکان نا درمان نا آسراتی ایتنہ و فائدہ ہرفوک خاہوت دااسکیم نا رداٹ تینا درمان ءِ ہرنجی یا سرکاری ہسپتال آتیان کرفنگ کیک۔ اوپارے کہ ہیلتھ کارڈ آن پد داسہ پنجاب اٹی بزغرکارڈ ہم درستی راستی کرفنگانے چنکابزغر آتا تناسب 97 درسد ءِ بزغرکارڈ انا رجسٹریشن نا بناءِ کننگانے ملک اٹی سرکار نا کنڈآن تروک آ سبسڈی آن مست زوراور و مراعات یافتہ تپہ فائدہ ہرفیکہ ولے داسہ نن بزغر کارڈ انا کمک اٹ براہ راست غریب و چنکا بزغر آتے کھد، کشاری دوائی، بج اٹی سبسڈی ایتک۔ اوپارے کہ نن پسماندہ و شیفکو تپہ ءِ بڑزا ہرفوئی ءِ احساس پروگرام نا رداٹ 88 درسد سروے مسنے داسروے نا رداٹ غربت نا جاچ ءِ ہلنگ انگ ءِ ہراتم پورو ڈیٹا بریک تو براہ راست غریب بندغ آتے سبسڈی ایتنہ اوپارے کہ آسودہی ریاست مدینہ نا تصور ہنداخاطرآن تسن کہ او اسہ یونیک ڈویلپمنٹ اس ئس ہموڑے بادشاہ تا جاگہ غا غریب آتا بہبود کن گام گیج کننگا چین سوا ارب نا آبادی ٹی ہفتاد کروڑ مخلوق ءِ نیزگاری آن کشا، چین ویسٹرن چائنہ نا پدی سلوک آ علاقہ غاتے ویسٹرن روٹ اتون گنڈا نن ہم ویسٹرن روٹ انا کمک اٹ پسماندگی ءِ چٹفنہ ڈی آر آئی و سی پیک ایسٹرن نا کمک اٹ دنیا نا شون ہلوک ملک آتون منسلک کینہ اوپارے کہ بلوچستان جان جوڑی کارڈ انا رداٹ چست کروک آ گام گیج ستاکڑزک۔ دود آن تران کرسا بنجائی وزیر مواصلات وپوسٹل سروسز مراد سعید پارے کہ مستین ناپانزدہ سال انا کارکڑد آن ننا دونیم سالہ کارکڑد نمان ءِ ہراٹی پانزدہ سال آتے ٹی یانزدہ سد کلومیٹر نا بیرہ ڈٹ بندی کننگا وخت اس کہ نن دونیم سال اٹی 3300کلومیٹر شاہراہ تا نئے بیرہ ڈٹ بندی ءِ کرین بلکن عملدرآمد نا ہم بناءِ کرین۔ وزیراعظم عمران خان نا ویژن نا رداٹ بلوچستان تون اوار پسماندہ علاقہ غاتا شونداری ننا مشن نا حصہ ءِ دود آن تران کرسا وزیراعلیٰ بلوچستان جام کمال خان پارے کہ داوخت آ بنجائی حکومت نا کمک اٹ بلوچستان اٹی شاہراہ تا تفنگ تون اوار شونداری ڈٹ آتیا کاریم برجا ءِ چمن کوئٹہ کراچی 790 کلومیٹر روڈ آ پبلک پرائیویٹ پارٹنر شپ انا رداٹ زوت کاریم نا بناءِ کننگک ہرا ساڑی حکومت نا بلوچستان نا الس کن اسہ ٹیکی اس مریک۔
