کوئٹہ۔ 28 اپریل (اے پی پی) بنجائی وزیر مواصلات و پوسٹل سروسز مراد سعید پارینے کہ چین۔ پاکستان اکنامک کوریڈور نا دیکی روٹ انا بناءِ ساڑی حکومت بلوچستان آن کرے و دادے حقیقت اس جوڑ کرینے۔ سی پیک نا دیکی روٹ ءِ ساڑی دور حکومت اٹ پورو کننگک۔ اوداہیت ءِ داڑے وزارت مواصلات، نیشنل ہائی وے اتھارٹی نا کوئٹہ ویسٹرن بائی پاس ءِ دوہراکننگ، ڈیرہ مراد جمالی بائی پاس و زیارت موڑ۔ کچ۔ ہرنائی۔سنجاوی روڈ انا تفنگ نا ڈٹ آتا بنداو ءِ تخنگ نا وخت آ گپ وتران کرسا پارے۔ مراد سعید پارے کہ تدوک آ پانزدہ سال آتے ٹی 1100 مریس سڑک آتا ڈٹ بندی کننگا، وخت اس کہ ساڑی حکومت دونیم سال اٹی 3300کلومیٹر مریس شاہراہ تا ڈٹ آتا نئے بیرہ ڈٹ بندی ءِ کننگا بلکن اوفتیا کاریم ہم بناکرے۔ اوپارے کہ ساڑی حکومت سی پیک نا دیکی روٹ ءِ حقیقت اس جوڑ کرینے و داروٹ ءِ ساڑی دور حکومت اٹ پورو کینہ۔ اوپارے کہ ژوب۔ خضدار ڈٹ آ کاریم بناکرینے وخت اس کہ ڈیرہ اسماعیل خان۔ ژوب شاہراہ نا ڈٹ آتا منظوری مسنے و دافتیا کاریم نا زوت بناءِ کننگک۔ اوپارے کہ بسیمہ۔ خضدار و ہوشاب۔ آواران ڈٹ آہم کاریم بناکرینے۔ اوپارے کہ 796کلومیٹر چمن۔ کوئٹہ۔ کراچی شاہراہ ءِ دوہرا کننگ نا کاریم ءِ ہندا سال شروع کننگک۔ اوپارے کہ شاہراہ تا تفنگ و ودکی آن نئے بیرہ بلوچستان نا مر مر انگا علاقہ غاتے ٹی زرگزرانی شونداری نا پوسکن آ دور بناکیک بلکن سی پیک نا کمک اٹ مچ آ ڈیہہ ٹی زرگزرانی شونداری نا کسر آوار مریک۔ داوخت آ چیئرمین نیشنل ہائی وے اتھارٹی کیپٹن (ر) محمد خرم آغا ڈٹ آتا سرجم آتے پارسا پارے کہ کوئٹہ ویسٹرن بائی پاس ءِ دوہرا کننگ نا ڈٹ کوئٹہ شار اٹی ٹریفک نظام ءِ گچین کننگ نا بات خاص اہمیت تخک۔ دانا مرغنی 22.7کلومیٹر ءِ و کنٹریکٹ نا خڑچ 3938ملین روپئی آن زیات ءِ۔ سال 2020-21ء ٹی دا ڈٹ اکن 1500 ملین روپئی جتا کننگانے۔ دولین(ودکی) آتالان دا سڑک نا چوڑائی7.3میٹر مریک۔ آوار علاقہ ٹی رفتار نا حد 100کلومیٹر فی گھنٹہ وخت اس کہ مشی آ علاقہ ٹی 80 کلومیٹر فی گھنٹہ مریک۔ دا ڈٹ 2 سال اٹی پورو کننگک۔ کوئٹہ ویسٹرن بائی پاس ءِ دوہرا کننگ آن کوئٹہ شار انا تہہ ٹی ٹریفک نا ہن و بر اٹ آسانی مریک و بھلا ٹریفک شار اٹ پترینگ انگ آن بیدس تینا مزل نا کنڈآن رواں دواں مریک۔ ہنداوڑ ڈیرہ مراد جمالی نا تفنگ آن شکست آتے کنٹرول کننگ اٹ کمک رسینگک۔ و شار اٹی ٹریفک نا رش آن نجات ملک۔ ہندی آبادی ءِ روزگار نا وارخواہی دوبریک۔ ہنداوڑ ڈیرہ مراد جمالی بائی پاس نا مرغنی 11 کلومیٹرآن زیات مریک۔ سڑک نا چوڑائی 7.3میٹر وخت اس کہ ہڑتوم آ کنڈ3میٹر چوڑا شولڈر اس ہم مریک۔

متعلقہ مضامینمصنف کی طرف سے مزید