اسلام آباد۔27اپریل (اے پی پی): ملک ءِ مستر ڈاکٹر عارف علوی ءَ زالبول آنی ھک آنی رکھینگ ءُ گیش کنگ ءِ ھاترا اسلامی نظریاتی کونسل ءِ کرد ءِ ارزشت ءِ سر ءَ زور پرداتگ ءُ گوشتگ کہ زالبول آنی معاشی پڑ ءَ ھوار نہ بوھگ ءَ چاگرد دیمروئی کت نہ کنت، اسلام ءَ زالبول آناں چاگردی ءُ معاشی ھک داتگ۔ عالم ءُ پیش امام آھانی ھک آنی دیم ءَ استیں اوشت آناں دور کنگ ءِ ھوالگ ءَ سرپدی دیگ ءِ ھاسیں کرد پیلو کت کناں، آ گوں اسلامی نظریاتی کونسل ءِ چیئرمین ڈاکٹر قبلہ ایاز ءَ گوں گپ ءُ تران کنگ ءَ ات۔ کہ آئی ءَ سئے شمبے ءِ روچ ءَ ایوان ءِ صدر ءَ گوں یکے دومیگ ءَ گند ءُ نند کتگ انت۔ ملک ءِ مستر ءَ گوشتگ کہ اسلام ءَ زالبول آناں بازیں ھک ءِ داتگ بلے چاگرد آھاناں اے ھک ءَ چہ زبھر کنت، آئی ءَ زالبول آنی ھک ءُ ھاسکر جائیداد ءِ تہا آھاناں ھک دیگ ءِ ھوالگ ءَ زانت ءُ سرپدی ودی کنگ ءِ ضلورت ءِ سر ءَ زور پر داتگ ءُ گوشتگ کہ اسلامی نظریاتی کونسل عالم ءُ پیش امام آنی وسیلگ ءَ زالبول آنی ھک آنی ھوالگ ءَ زانت ءُ سرپدی ودی بکن انت۔ ملک مستر ءَ گوشتگ کہ آئی ءَ ھمگرنچیں پڑاں پہ زالبول آنی جان سلامتی ءِ جیڈھ ءُ جنجال آنی گیش ءُ گیوار کنگ ءِ ھاترا ٹیلی ہیلتھ پروگرام بندات کنگ ءِ پنت ءُ شون کتگ۔ اے موہ ءَ ڈاکٹر قبلہ ایاز ءَ عالم آنی نیمگ ءَ چہ ملک مستر ءِ زالبول آناں وت واک کنگ ءُ جان سلامتی ءِھوالگ ءَ سرپدی پیداک کنگ ءِ کوشست آنی تہ ءَ کمک کنگ ءِ اوست داتگ۔
