اسلام آباد۔ 27 اپریل (اے پی پی) وزیر خارجہ شاہ محمود قریشی پارینے کہ سویلی ایشیائی ملک آتے کوویڈ۔ 19 دینی مرض انا مون ءِ توننگ و تینا الس ءِ غریبی آن کشنگ کن علاقائی کمکاری ءِ ودفنگ نا سخت گرج ءِ۔ 6 ہمسایہ ملک آتا دا فورم دا مسخت کن اسہ اہم ءُ پلیٹ فارم اسے، نن متحد، تینا مہارت آتے گچین کرسا و سیاسی گڑتی تیان ایڑتر مرسا اسہ ہندن ءُ شریداری اس قائم کننگ کیک ہرا علاقائی شونہالی ٹی اہم کڑد ادا کے۔ ننے موسمیاتی بدلی و فضائی کچٹی کون آ چیلنج مون تروک ءِ۔ سے شنبے نادے آ پاکستان، چین، اوغانستان، بنگلہ دیش، نیپال و سری لنکا غا تالان 6 ملکی وزارتی کانفرنس آن تران کرسا وزیر خارجہ چین و سویلی ایشیائی ملک آتا نیام اٹ کوویڈ۔ 19 دینی مرض، نیزگاری و قدرتی آفت آتا بشخ آتے ٹی تین پہ تینی کمکاری نا ستاءِ کرے و پارے کہ دا پاکستان نا راجی اقتصادی شونداری اولیت آتا رداٹ ءِ و دا ڑآن علاقائی ملک آتے اسہ ایلو نا آزموندہ غاتیان فائدہ ہرفنگ نا موقع ہم ملک۔ داچرجوئی ٹی پاکستان علاقائی کمکاری کن چین نا پیش کروک مسہ پبی سلاہ تا مخ تفی ءِ کرینے۔ وزیر خارجہ پارے کہ چائنا۔ ساؤتھ ایشیاء ایمرجنسی ریزرو غٹ شریک ملک آتے آخبت اٹ جان جوڑی نا ہلہلہ ئی حالیت و قدرتی آفت آتون جوان وڑاٹ مون تننگ اٹ کمک فراوان کیک۔ ننے موسمیاتی بدلی و ایلو قدرتی آفت آتا چیلنج مون تروک ءِ۔ نیزگاری نا چٹفنگ کن چین۔ سویلی ایشیاء کوآپریٹو ڈویلپمنٹ سینٹر نیزگاری نا چٹفنگ اٹ چین نا قابل ذکر سرسہبی تیان فائدہ ہرفنگ نا موقع فراوان کیک۔ داڑآن ادارہ جاتی و السی رابطہ غاتے ٹی کمک رسینگک۔ وزیر خارجہ مخدوم شاہ محمود قریشی پارے کہ ننا نیام اٹ وائس منسٹرز و ڈائریکٹر جنرلز آتا کہو ل آاِرا ورکنگ پڑک آتا کمک اٹ رابطہ استوار مسنے۔ تدوک آ ہفتہ ننا نائب وزارتی کہول انا دیوان اٹی کورونا دین انا تالانی ءِ توننگ تون اوار اوار نیزگاری نا چٹفنگ آ ہم سیر اٹ گپ وتران مس۔ نن دا رداٹ چین و سویلی ایشیائی ملک آتا نیام اٹ ودوک آ کمکاری نا ستاءِ کینہ، دا حکومت پاکستان نا زرگزرانی و راجی اولیت آتون مطابقت تخک۔ دا ننے موقع فراوان کیک کہ نن علاقائی کہول آ اسہ ایلو نا آزموندہ غاتیان فائدہ ہرفنگ کین۔ اوپارے کہ ننا ملک آک ہرا موسمیاتی بدلی، قدرتی آفت و خطرہ غاتا مون اٹی مریرہ اوفتے کن دا پلیٹ فارم بھاز اہمیت تخک۔ ہراڑے نن اواری اٹ دا قدرتی آفت آتا بطریق جوان وڑاٹ مقابلہ ءِ کننگ نا لائخی ودی کننگ کینہ۔ چین انا کنڈآن، چین۔ سویلی ایشیانیزگاری نا چٹفنگ نا بابت سرسہب آزموندہ غان فائدہ ہرفنگ کہرہ و اسہ ایلو نا آزموندہ غاتیان ہم فائدہ ہرفنگ کیرہ۔ دافورم آن ادارہ جاتی رابطہ غاتا ٹہیفنگ و السی کہول آ رابطہ غاتا مون آ دننگ اٹ کمک رسینگک۔
