اسلام آباد۔ 27 اپریل (اے پی پی)وزیراعظم نا خصوصی کمکار جان جوڑی ڈاکٹر فیصل سلطان الس آن خواست کرینے کہ این سی او سی نا فیصلہ غاتیا پت کیر۔ کورونا کیس آتازیات کچ انگا ضلع غاتے ٹی لاک ڈاؤن خلنگ مریک۔ مچ آ ملک اٹی ویکسین خلنگ نا عمل برجاءِ، حکومت 30مارچ آن ویکسین نا 30 لکھ خور ہلکونے، الس آن خواست ءِ کہ دا ہلوک آ دین انا مون ءِ توننگ کن عئید ءِ سادگی اٹ کیر۔ سے شنبے نادے آ این سی او سی نا میڈیا ءِ حوال ترسا اوپارے کہ مچ آ ملک اٹی 1200ویکسی نیشن سینٹر کاریم کننگ ءُ اگہ ناجوڑی نا تالانی ودسا ہنا و ایس او پی تیا خاطر خواہ حد اسکان عمل متو تو ایلو شار تیٹی ہم لاک ڈاؤن لگنگ کیک۔ اوپارے کہ ننے این سی او سی ٹی چندی شار و علاقہ غاتیان حساب وکتاب ملنگ ءِ۔ دا علاقہ غاتا ہیلتھ سسٹم آ دباؤ نا ہم معلوم مریک۔ الس این سی او سی نا فیصلہ غاتیا پت کیر۔ حکومت ہیلتھ سسٹم ءِ گچین کننگ ءِ۔اوپارے کہ آکسیجن نا باندات آ ننا کمیٹی نظر تخانے۔ مچ آ ملک اٹی آکسیجن نا پیدوار نا یونٹس و امور ءِ ہُننگ انگ ءِ۔ آکسیجن نا بند پلانٹ آتے چلیفنگ کن ہم انجینئر کاریم کننگ ءُ۔ چندی ملک آتیان درآمد نا ہم جاچ ءِ ہلنگ انگ ءِ۔ اوپارے کہ چندی ہند آتے ٹی آکسیجن نا ترسیل نا عمل ہم گچین و اہم مریک دا بابت ٹرانسپور ٹ نا بشخ آ ہم نظر تخنگ انگ ءِ۔ اوپارے کہ ویکسین نا عمل شفاف وڑاٹ چلینگ انگ ءِ۔ داتاثر درست اف کہ نن بیرہ عطیہ ٹی ملوک آ ویکسین تے خلنگ اُن۔ مسہ جتا ویکسین جوڑ کروک آتیان ویکسین ہلنگ اُن۔ 30 مارچ آن 30 لکھ خور ہلنگانے۔ اوپارے کہ داکان بیدس نن ویکسین نا 3 کروڑ خور آتا ہلنگ نا معاہدہ کننگ اُن۔ 17 لکھ خور چین نا کنڈآن ٹیکی ٹی ملانے۔ چندی ملک آتے ٹی ناجوڑی ترندی اٹ تالان مننگ ءِ۔ دانا سوب آن ویکسین نا پیدوار آ ہم زور ودنگ ءِ۔ کینیڈا و یورپی یونین اٹی ہم ویکسین نا سپلائی کم مننگ نا سوب آن ویکسین خلنگ نا عمل سست مسنے۔ داوڑنا حالیت آتے ٹی پیسہ مننگ آن پد ہم چیلنج جوڑ کننگک۔ اوپارے کہ مچ آ ملک اٹی 1200ویکسی نیشن سینٹر کاریم کننگ ءُ دافتے ٹی 22 بھلو ویکسی نیشن سینٹر ءُ۔ داتم اسکان 20 لکھ مخلوق ءِ ویکسین خلنگانے۔ تدوک آدے 88 ہزار بندغ ءِ ویکسین خلنگانے۔ 50 سال آن زیات وئی نا بندغ آک ہم داسہ 1166آ رجسٹریشن کرفسا ویکسین سینٹر آتیا ہنسا ویکسین خلنگ کیرہ۔ اینو آن 40 آن 50 سال انا وئی نا گروپ نا بندغ آتا رجسٹریشن نا عمل نابناءِ کننگ انگ ءِ۔ اوالس آن خواست کرے کہ مچی والا جاگہ غاتیا ہنپس، ماسک بینر، اوپارے کہ داوار روچہ و عئید ءِ سادگی اٹ کروئی مریک۔
