اقوام متحدہ۔ 27 اپریل (اے پی پی) پاکستان مچ آ دنیاٹی کورونا دین آن بچنگ نا ویکسین نا ساف و بریبر بشخنگ ءِ پک کننگ نا مسخت نا دوئی کننگ کن اقوام متحدہ نا مہم نا ستاءِ کرسا خواست کرینے کہ کورونا ویکسین نا بابت غلط معلومداری نا تالانی ءِ توننگ و گچین وڑاٹ معلوماتی کلہو سرکننگ کن چندی بولی تے کاریم اٹ اتنگے۔ اقوام متحدہ ٹی پاکستانی مشن نا پریس قونصلر مریم شیخ اقوام متحدہ نا جنرل اسمبلی نا ماتحت ادارہ کمیٹی آن انفارمیشن یعنی معلوماتی کمیٹی ٹی مروک آ لس شرہ ٹی پارے کہ کثیر السانیت و دانا مون آ دننگ اقوام متحدہ نا مسخت آتیان اسٹ ءِ۔ پاکستانی مندوب اردو و ایلو غیر سرکاری بولی تیٹی سیکرٹری جنرل نا اہم کلہو آتا مٹ وبدل ءِ کننگ آ اقوام متحدہ نا ڈیپارٹمنٹ آف گلوبل کمیونیکیشنز (ڈی جی سی) نا منت واری ءِ ہرفے۔ اوڈیپارٹمنٹ آ زور شاغاکہ او باسک ریاست آتا نیام اٹ ہیت وگپ نا بناءِ کے تانکہ دروغ انا خبر تا ودوک آ رجحان ءِ توننگ و سجفوک وڑاٹ غلط معلومداری تے تالان کروک آ نیٹ ورک آتے چٹفنگ نا گام گیج آتیا سجفنگے۔ اوپیدواری کرے کہ دنیا نا گیشتر نیزگار بندغ آتون پت انا قابل، اڑزآن انٹرنیٹ رسینگ نا کمتی ءِ و او کورونا دین انا وخت آ ٹیکنالوجی آن ہم فائدہ ہرفنگ کتوس۔ دین اٹی انٹرنیٹ رابطہ غا منحصر ازباب و انٹرنیٹ ڈیوائس آتیا سیبو ودسا نظر بسنے ولے داڑتون اوار اوار انٹرنیٹ آ دروغ انا خبر و غلط معلومداری تا تالانی ٹی ہم بے کچ ودکی مسنے ہنداخاطرآن دا چرجوئی ٹی اقوام متحدہ نا ادارہ غاتے مرے کہ او تینا مینڈیٹ و ساڑی وسیلہ غاتے ٹی مرسا دا ڈیجیٹل پرخ ءِ مر کننگ کن پوسکن ءُ حکمت عملی تیار کیر۔ اوکورونا نا دین اٹی غلط معلومداری و دروغ انا خبر تا توننگ نا اقوام متحدہ نا مسخت نا دوئی کننگ کن اقوام متحدہ نا ڈیپارٹمنٹ آف گلوبل کمیونیکیشنز (ڈی جی سی) نا، پک کروک گام، انا کمک اٹ کروک آ کوشست آتا ستاءِ کرے۔ پاکستانی مندوب ڈی سی جی آ ہم زور شاغا کہ او پدتموک ملک آتے ٹی مواصلات نا بنداوی پنجر و لائخی تا مون آ دننگ کن تینا تکنیکی کمک و مدت اٹ ودکی کے و اقوام متحدہ نا امن مشن تے ٹی خذمت سرتروک آ ملک آتا دستہ و پولیس نا کمکاری نا شریدار و خاص وڑاٹ کورونا دین اٹی امن مشن نا کارندہ غاتا قربانی تے ہم تالان کے۔
