ملتان۔ 26اپریل (اے پی پی) وزیراعظم عمران خان پارینے کہ پاکستان اٹی کشت وکشار کن بھاز جوان ءُ موسم و درجہ حرارت اسے اوڑآن پورو فائدہ ہرفنہ، کشت وکشار ءِ گچین کرسا 25 آن 30 ارب ڈالر دوئی کننگ مریک، بزغرکارڈ اسہ جوان ءُ ڈٹ اسے داڑآن بزغرآتے فائدہ مریک۔ دوشنبے نادے آ ملتان اٹی بزغرآتے ٹی بزغر کارڈ انا بشخنگ نا دود آن تران کرسا اوپارے کہ ننا دور اٹی بزغرآتے خولم نا گچین کمکی نہاد تننگا ہراڑآن اوفتے 500 ارب روپئی زیات ملانے، بزغرکارڈ انا کمک اٹ بزغرآتے وام ملک، نہری نظام ءِ جوان جوڑ کننگ انگ ءِ، پاکستان نا آبو ہوا کشت وکشار کن بھاز جوانءِ، لائیو اسٹاک نا بشخ اٹی گچینی آن پال و سُو انا بشخ اٹی گچینی بریک، وخت پک کیک کہ نن پوسکن آ کشت وکشار نا کنڈآ ہِننگ اُن، کشت وکشار نا بشخ اٹی ٹیکنالوجی نا کاریم اٹ اتنگ آن کرپشن اٹی کمتی بریک۔ پاکستان نا خلقی علاقہ غاتے ٹی غریبی زیات ءِ، ننا حکومت اِرا بھلا ڈیم تیا کاریم نا بناءِ کرے، کشت وکشار نا بشخ اٹی چین نا پوسکن آ ٹیکنالوجی نا آزموندہ غاتیان فائدہ ہرفنہ، لائیو اسٹاک نا بشخ اٹی پاکستان نا دنیاٹی ہشت می نمبر ءِ، وزیراعظم پارے کہ پاکستان اٹی سوزی و میوہ غاتا پیدوار آن منڈی اسکان سرمننگ نا نسخان 40 درسد ءِ و خولم نا پیدوار آن منڈی اسکان نا نسخان 20 درسد ءِ، دا ارب آ روپئی تا نسخان ءِ، اگہ دا نسخانک مفس تو کشارگر آتا کٹیااِراہنداخہ پین و نہادآک ہم کم مریر، داڑآن بچنگ کن کولڈ سٹوریج ہند و فوڈ پروسیسنگ پوائنٹ خلینہ۔اوپارے کہ پاکستان اٹی داسال ریکارڈ خولم نا گمان ءِ، آثار لگنگ ءِ کہ خولم نا پیدوار نا غٹ ریکارڈ پنک۔ وزیراعظم پارے کہ بزغرآتا وام تے دوگناکینہ تانکہ پیدوار ودے، خولم نا کمکی نہاد اٹی ودکی آن بزغرآتے 500ار ب روپئی ودکی ملے۔ وزیراعظم پارے کہ نن دال و اسپغول درآمد کینہ وخت اس کہ اوفتا پیدوار داڑے مننگ کیک و دافتے درآمد کننگ نا ضرورت اف، پوٹاشیم و فاسفیٹ بالترتیب میانوالی ٹی 6 ارب ٹن و ہزارہ ٹی 27 لکھ ٹن ساڑی ءِ، کوشست کینہ کہ کھد آتادرآمد ءِ تورن و ہندی کہول آ دا تیار مرے۔ اوپارے کہ نن بزغر آتا کٹیا ءِ اِراہنداخہ پین کننگ خوانہ، داڑآن کاشت ودک، مکئی، خولم و برنج نا پیدوار ءِ اِراہنداخہ پین کینہ۔ داڑکن چینی آزموندہ و ٹیکنالوجی آن فائدہ ہرفنہ۔ اوپارے کہ نن کنوئی آ تیل پیشن آن خواہفنگ اُن، اونا درآمد نا جاگہ غا اونا داڑے پیدوار مننگ کیک۔ وزیراعظم پارے کہ ننا ہدف ءِ کہ میوہ و سوزی تا پیدوار 5 درسد اسکان ودفن، دال تا پیدوار ءِ اِراہنداخہ پین کین، فشریز و پرونز آتا پیدوارءِ ودفن، مکئی نا داوخت آ پیدوار 8 ملین ٹن ءِ دادے ودفسا 25ملین ٹن اسکان دینہ۔ وزیراعظم پارے کہ او بشخ انا تینٹ کماشی و مانیٹرنگ ءِ کیک و ہرا ڈٹ آتے نا مون آ تخر دابابت سرجم آتے بروک آ اِراہفتہ ٹی تینٹ بزغرآتا مون آ تخک، دانا ٹائم فریم اس ایتیوہ۔ اوپارے کہ حکومت پنجاب و وزیراعلیٰ عثمان بزدار ءِ بزغر آتے کن بزغرکارڈ انا جاری کننگ آ خراج تحسین پیش کیوہ، داگام ہمووڑ ءِ ہراوڑ جان جوڑی نا بشخ اٹی ہیلتھ کارڈ ءِ، جان جوڑی کارڈ آن ہیلتھ سیکٹر و بزغرکارڈ آن کشت و کشار نا بشخ بدل مریک۔ داڑآن 50 لکھ اسکان بزغرآتے رکھ ملک، اوفتے کن آسانی ودی مریک، داڑآن مخلوق ءِ اڑزآن گڑا دوبننگ کیک۔ اوپارے کہ جان جوڑی کارڈ آن ہیلتھ انا بشخ اٹی پوسکن ءُ ہسپتال جوڑ مریک، جان جوڑی کارڈ آن ہر خاہوت تینا درمان ءِ کرفنگ کیک۔ وزیراعظم پارے کہ پاکستان اٹی 15آن 38 درجہ حرارت مریک ہراہروڑنا میوہ و سوزی تا پیدوار کن جوان ءِ، داڑآن فائدہ ہرفنہ و داکنڈآ اولیکو گام بزغرکارڈ ءِ۔ دود آن صوبائی وزیر کشت وکشار سید حسنین جہانیاں و وزیراعلیٰ عثمان بزدار ئسک ہم تران کریر۔
