اسلام آباد۔ 26اپریل (اے پی پی) وزیراعظم عمران خان کورونا دین آن ودی مروک آ حالیت و زرگزران نا بحالی کن چار ٹکی ایجنڈا سلاہ کرسا پارینے کہ کوویڈ۔ 19 نا دین انا سوب آن بھلا جہانی تنکی مون تروک ءِ، السی جان جوڑی و راجی رکھ ءِ مون آ دننگ نا گرج ءِ، دین انا سوب آن پائیدار شونداری نا ہدف آتا دوئی کننگ اٹ مشکلات ءِ، پاکستان ماحولیاتی بدلی نا بابت جامع پالیسی تیا عمل کننگ ءِ، بیرہ علاقائی و جہانی کمکاری ٹی ودکی نا کمک اٹ غٹ اکن اڑزآن ویکسین اسکان بریبر رسینگ ءِ پک کننگ کینہ، پدتموک ملک آتے کن وام تا ویل ءِ ساف و پائیدار وڑاٹ ایسر کروئی مریک۔ داخیال آتا درشانی ءِ او اقتصادی و راجی کمیشن ایشیا و بحرالکاہل نا 77 می دیوان نا بنائی سیشن آن ورچوئل تران کرسا کرے۔ وزیراعظم ننے کوویڈ۔ 19 دین انا سوب آن بھلا جہانی تنکی مون تروک ءِ و مچ آ دنیا ٹی دانا جان جوڑی آ تباہ کن و راجی و اقتصادی اثرتمانے۔ ایشیا و بحرالکاہل نا ملک آک ہم دادین اتون مون تننگ ءُ۔ مست آن ساڑی نزوری و بے بریبریک پین ترند مسنو و داسہ نن پائیدار شونداری نا ہدف آتا دوئی کننگ اٹ مست آن ہم پین پدی مسنونن و 100 ملین آن زیات مخلوق نیزگاری نا پلویڑ اٹی بریرہ۔ اوپارے کہ کوویڈ۔ 19آن مست انا کٹیا نا کہول ءِ دُوارہ دوئی کننگ اٹ کیہی سال لگنگ کیک۔ مالی کچ اٹی پرخ، درمان و ویکسین نا فراوانی نا سوب آن چندی ملک و ڈیہہ غاتے ٹی بے بریبری ودی مننگ کیک۔ اوپارے کہ نن داہیت ءِ پک کین کہ کس اس ہم پدی سلپ و داڑکن جہانی یکجہتی نا گرج ءِ۔ ننے قومی کہول آ گام گیج، علاقائی و کثیر الجہتی کمکاری ءِ مربوط کننگ نا گرج ءِ، وزیراعظم پارے کہ او دا چرجوئی ٹی چار اہم بشخ آتیا چکار کننگ نا سلاہ پیش کیک۔ غٹ آن مست ننے الس ءِ نیزگار دوست و جامع پایسی تا وت جوڑ کروئی مریک۔ ننے جان جوڑی و راجی رکھ انا نظام ء، سوگو کننگ نا گرج ءِ و دا پاکستان اٹی ننکن بنداوی مسخت آک ءُ۔ الس نا زرگزرانی رکھ داسہ ننا شونداری حکمت عملی نا بنداو ءِ۔ وزیراعظم پارے کہ ارٹ میکو، امن و شونداری انسانی حق انا بنداو مرے و اودے جہانی کہول آ برقرار تخنگ تون اوار اوار اونا رکھ ہم المی ءِ۔ جہانی برادری ءِ مرے کہ درملکی تسلط کون آ حالیت آتیا خاص چکار کے۔ اوپارے کہ مسٹ میکو بحالی نا حالیت آتے ٹی ننے تینا زرگزران تے پین پائیدار و سوگوبنداو تیا قائم کننگ نا موقع ملک۔موسمیاتی بدلی نا اثرآتون مون تننگ کن جامع گام گیج مون آ ہِننگ نا کسر ءِ۔ پاکستان سبز نمو کن جامع پالیسی تیا عمل کننگ ءِ۔ وزیراعظم پارے کہ چارمیکو، شونداری کن جوان مالی وسیلہ غاتے کاریم اٹ اتنگ نا گرج ءِ۔ پدتموک ملک آتے کن وام انا ویل ءِ ساف و پائیدار وڑاٹ ایسر کروئی مریک۔ وزیراعظم پارے کہ ”وام تیٹی ریلیف نا بابت جہانی گام“ انا بابت اونا اپیل اتون پاکستان دنیا نا غٹ جہانی فورم تیا دا مسخت نا وکالت ءِ کرسا کرینے و ملک اٹی نن مالیاتی اصلاحات آ عمل کننگ اُن۔ وزیراعظم پارے کہ غٹ آن بھلا سوج دادے کہ نن دا اہم ہدف آتے دوئی کننگ کن انت وڑوڈول اس اختیار کین۔ نن غٹ تینا تینا زرگزران تے اول سرآن بحال و مست آن گچین کننگ خوانہ ولے دا کاریم ءِ تنیا کننگ مفک۔
