اسلام آباد۔ 26 اپریل (اے پی پی) ملک اٹی توانائی نا گرج آتے پورو کننگ و چاگڑد وست اڑزآن توانائی نا پیدوار کن چین پاکستان اقتصادی راہداری ڈٹ انا ارٹ میکو ریسہ نا رداٹ بروک آ شش سال اٹی 7 ارب 70 کروڑ ڈالرنا خڑچ آن 3 ہزار 428 میگاواٹ پن بجلی نا ڈٹ آتے پورو کننگک، دا ڈٹ آتیان لکھ آ بندغ آتے کن روزگار نا بھلو وارخواہی اس ہم ودی مریک، کول انرجی نا 9 ڈٹ ایسر اسکان سرمسنو، ہراڑآن 5320میگاواٹ بجلی مین گریڈ اٹی اوار مننگ ءِ، ہراڑآن لوڈشیڈنگ نا مون ءِ توننگ اٹ کمک رسینگانے۔ سی پیک اتھارٹی نا کمامدارآک دوشنبے نادے آ اے پی پی ءِ پاریر کہ 4 پن بجلی ڈٹ آتیان اولیکو ڈٹ اسہ ارب 70 کروڑ ڈالر نا خڑچ آن تفنگوک آ کروڑٹ ہائیڈرو پاور پراجیکٹ ءِ ہراڑآن 720 میگاواٹ اڑزآن بجلی اینخو سال قومی گریڈ اٹی اوار مریک۔ ارٹ میک وڈٹ 2 ارب ڈالر ناخڑچ آن تفنگوک آ سکی کناری ہائیڈرو پاور پروجیکٹ ءِ ہراڑآن 884 میگاواٹ بجلی بروک آ سال اسکان قومی گریڈ اٹی اوار مریک۔ مسٹ میکو ڈٹ اسہ ارب 50 کروڑ ڈالر نا خڑچ آن تفنگوک آ آزاد پتن ہائیڈرو پاور پروجیکٹ ءِ ہراڑآن 700 میگاواٹ بجلی 2026اسکان قومی گریڈ اٹی اوار مریک۔ چارمیکو ڈٹ 2 ارب 50 کروڑ ڈالر نا خڑچ آن کوہالہ ہائیڈرو پاور پروجیکٹ ءِ ہراڑآن 1124میگاواٹ بجلی 2027اسکان قومی گریڈ اٹی اوار مریک۔ دا ڈٹ آتا پوروی آن ملک اٹی اڑزآن و چاگڑد دوست پن بجلی دوبریک۔ کمامدارآک پاریر کہ سی پیک نئے بیرہ ملک ءِ بجلی نا گرج آتے پورو کننگ اٹ کمک فراوان کننگءِ بلکن توانائی نا خواست ورسینگ ءِ متوازن کننگ و درآمدی ایندھن آ سیبو ءِ کم کننگ اٹ ہم کمک کننگ ءِ۔ سی پیک ڈٹ انا رداٹ کروٹ ہائیڈرو پاور پروجیکٹ آن 720 میگاواٹ بجلی دوئی کننگک، ہرا 1.74ارب ڈالر آن تفنگ انگ ءِ، آ پیش رفت برجاءِ دانا پوروی آن پنجا لکھ انا آبادی ءِ کلین اینڈ گرین انرجی نا فراوانی پک مریک، دا ڈٹ آن کم و ود 4500 مخلوق ءِ روزگار نا وارخواہی ہم دوبریک۔ پاک چین اقتصادی راہداری نا رداٹ آزاد جموں و کشمیر اٹی 1124میگاواٹ نا کوہالہ پن بجلی سہ فریقی ڈٹ آ سرسہبی اٹ دستخط مسنے۔ وزیراعظم نا تعمیراتی بشخ و اوڑتون تعلقدار صنعت نا بحالی کن کمکار ثابت مریک۔ دا ڈٹ آن 5ہزار مخلوق ءِ روزگار نا وارخواہی فراوان کننگک۔
