نئی دہلی۔ 26اپریل(اے پی پی) بھارت اٹی کورونا دین نا دین انا مسٹ میکو ترند انگا ریسہ غان ودی مروک آ بدترین حالیت آتیان انڈین پریمیئر لیگ (آئی پی ایل) اٹی ہم خوف و بھیم اس تالان مس۔ انڈین پریمیئر لیگ (آئی پی ایل) آن چندی درملکی گوازی گر آتا تینا تینا ملک آتیا پدی تننگ نا چرجوئی بناکرینے۔ اینڈ ریو ٹائی وطن آ پدی بس وخت اس کہ 2 پین آسٹریلوی کرکٹرآک فرنچائز ءِ پدی ہِننگ نا بابت معلومدار کریر۔ راجستھان رائلز اتون وابستہ آسٹریلوی پیسر اینڈ ریو ٹائی تدوک آ دے وطن آ پدی بننگ کن رادہ مسوسس۔ اوپدی بننگ ءِ جند انا سوب گوندا۔ ایلو کنڈآ بھارت کرکٹ اینڈ کنٹرول بورڈ(بی سی سی آئی) و فرنچائز پدریسہ داڑآ زور شاغنگ ءُ کہ آئی پی ایل منظم بائیو سیکیور ببل نا سوب آن رکھ ءِ۔ ولے ایلو کنڈآ بھارت اٹی ترندی اٹ مروک آ مرک آتیان پد کیہی درملکی کرکٹر پدی ہِننگ کن کوشست کننگ ءُ۔ برطانوی بلے باز لیام لیونگ سٹون ہم دم درینگ نا عذر ءِ پیش کرسا تدوک آ ہفتہ وطن آ پدی ہناسس۔ یات سلے کہ بھارت اٹی دے پہ دے کورونا دین انا کیس آتون اوار اوار مرک آتے ٹی ہم ودکی مرسا کننگ ءِ۔
