اسلام آباد۔ 23اپریل (اے پی پی) بنجائی وزیر خزانہ و محصولات شوکت ترین پارینے کہ حکومت سلابتی عمل ناذریعہ کلی زرگزران نا سوگوی و پائیدار اقتصادی بڑھوتری نا ہدف آتے دوئی کننگ اٹ سنبرینگوکءِ۔ اوداہیت ءِ جمعہ نادے آداڑے پاکستان اٹی جہانی بینک انا کنٹری ڈائریکٹر ناجی بن حسائن تون خیرخواہی اوڑدہی اسے ٹی گپ وتران کرساپارے۔ وزیر خزانہ شوکت ترین جہانی بینک انا کنٹری ڈائریکٹر ءِ جم جوش اٹ بخیر کرے وپارے کہ جہانی بینک کیہی سال آتیان پاکستان اٹ ادارہ جاتی اصلاحات و انسانی زراناشونداری نا ذریعہ اسلوب حکمرانی و خذمت آتافراوانی ٹی اہم کڑد ادا کرسا برسا کننگ ءِ۔ اوکوویڈ۔ 19آن زہمی زرگزران نا بحالی ٹی جہانی بینک انا وخت آ کمکاری نا ستاءِ کرے۔ وزیر خارجہ پارے کہ حکومت سلابتی عمل نا کمک اٹ کل زرگزرانی نا سوگوی و پائیدار اقتصادی بڑھوتری نا ہدف آتا دوئی کننگ اٹ سنبرینگوک ءِ۔ وزیر خزانہ جہانی بینک انا کنٹری ڈائریکٹر ءِ پارے کہ قومی اقتصادی سلابتی کونسل نا اولیکو دیوان اڈ ہلکونے۔ دیوان اٹی زرگزران ناپیدواری بشخ آتا احیانو نا فیصلہ ءِ کننگا۔ پائیداروجامع اقتصادی بڑھوتری کن اقتصادی سلابتی کونسل گونڈ، نیام مدی ومریس میعاد اقتصادی ڈٹ بندی ٹی کمک فراوان کیک۔ جہانی بینک انا کنٹری ڈائریکٹر وزارت خزانہ نازمواری تے سنبھالنگ آ وزیر خزانہ شوکت ترین ءِ مبارکبادی تس۔ اوپاکستان اٹ جہانی بینک انا برجاڈٹ و پروگرام تاپوروی ٹی کمک فراوان کننگ آ پاکستان نا حکومت نا منت واری ءِ ہرفے۔ وزیر خزانہ پارے کہ مالی سوگوی، خذمت آتاگچینی و گچین اسلوب حکمرانی ناہدف آتا دوئی کننگ اٹ بھلا شونداری شریداری ناحیثیت اٹ جہانی بینک اناپدریسہ مخ تفی اہم ءُ اہمیت اس تخک۔
