اسلام آباد۔23اپریل (اے پی پی): مزن وزیر ء ِ جان ء ُ سلامتی پڑءِ حاسیں کمک کار ڈاکٹر فیصل سلطان ءَ گشتگ کہ گوستگیں 24 کلاکانی تہا کورونا ءِ آماچیں نادراہ آنی کساس 4 ہزار 6 سد اِنت، کورونا ءِ گوستگیں لہر ءَ چہ انوگیں گیش تُرسناک تر ایں۔ میڈیا شونست ء ِ وہد ءَ آئی ءَ گشتگ کہ آماچیں نادراہ آنی شر ح 10 درسد ءَ چہ گیش اِنت۔ ایشی ءَ چہ اے گپ پدر بیت کہ کورونا ءِ ہوپ گیش بوہان اِنت، بازیں دمگ انچیں اَست اَنت کہ آہودہ 20 درسد شنگ بوتگ۔ آئی ءَ گشتگ کہ ایشی ءَ چہ ہیلتھ سسٹم ءِ سرءَ بار گیش بوتگ۔ ڈاکٹر فیصل سلطان ءَ گشتگ کہ آکسیجن ءِ سرءَ پریشر ہم گیش اِنت ءُ ما 90 درسد کارمرز کنگ ءَ اَنت، اے وڑیں جاورھالاں گیش بندش جنگ بوتگ۔ آئی گشتگ کہ اگاں ما ایشی ءِ سرءَ عمل ناکتگ گڑا ما جاورھال گیش ھراب بنت ءُ مارا سرجمی ءَ لاک ڈاؤن کنگ بیت۔ آئی ءَ گشتگ کہ منی گوں درستاں دزبندی اِنت کہ ایس او پیز ء ِ سرءَ عمل کنگ بہ بیت وتی ءُ وتی ھاندان ءِ جان ءُ سلامتی ءَ ہوار سرجمیں چاگرد ءِ جان ءُ سلامتی ءِ ھیال داری بہ کن اِت۔
