اسلام آباد۔ 22 اپریل (اے پی پی) وزیراعظم عمران خان اکنامک ایڈوائزری کونسل ءِ پارت کرینے کہ الس آ پین خراج خلنگ نا جاگہ غا ریلیف فراوان کننگ کن آؤٹ آف باکس سلوشن سلاہ کننگے، زرگزرانی سوگوی و پائیدار گروتھ کن روڈ میپ اس پیش کننگے۔ داپارت ءِ وزیراعظم تینا کماشی ٹی اکنامک ایڈوائزری کونسل نا دیوان آن تران کرسا کرے۔ وزیراعظم ویڈیو لنک انا کمک اٹ دیوان اٹی بشخ ہلک و غٹ باسک آتے اکنامک ایڈوائزری کونسل اٹ بخیر اٹ پارسا وزیر خزانہ ءِ پارت کرے کہ ملکی زرگزران نا بابت اہم باندات آ سلاہ پیش کروک آ داکونسل نا پورو وڑاٹ فعال مننگ ءِ پک کننگے۔ وزیراعظم پارے کہ اکنامک ایڈوائزری کونسل نا جوڑ کننگ نا مسخت ملکی زرگزران ءِ پائیدار بنداو تیا استوار کننگ نا بابت پنی آ زرگزرانی چاہندار آتا سلاہ آن فائدہ ہرفنگ ءِ۔ وزیراعظم زرگزرانی ویل آتا ذکر ءِ کرسا پارے کہ مشکل زرگزرانی حالیت آتا رداٹ الس آ خراج آتا پین بھاریم ءِ بِٹنگ نا جاگہ غا آؤٹ آف باکس سلوشن سلاہ کننگے تانکہ دافتیان ہراڑے الس ءِ ریلیف دوبرے ہموڑے زرگزران نا پائیدار شونداری ءِ پک کننگ مرے۔ وزیراعظم پارے کہ حکومتی کوشست آتا سوب آن کاروباری فضا گچین مس و کاروباری برادری نا پت بحال مسنے۔ اوپارے کہ حکومت نا ہروڑ کوشست مسنے کہ بزنس کمیونٹی نا سلابت آن نئے بیرہ پالیسی جوڑ کننگے بلکن دا پالیسی تا تسلسل ءِ ہم پک کننگے۔ وزیراعظم اکنامک ایڈوائزری کونسل ءِ پارت کرے کہ پائیدار زرگزرانی و سوگوی و شونداری نا بابت گونڈ وختی، نیام وختی و کثیر المدتی گام گیج آتیا مبنی روڈ میپ اس سلاہ کننگے تانکہ زرگزران نا اہم بشخ ہرافتے ٹی انرجی، تعمیرات، کشت وکشار، سیل وسوات، راجی رکھ، سبسڈیز، نہاد آتے ٹی سوگوی، چنکا و درمیانی صنعت نا مون آ دننگ، پیشن نا ملک آن ترسیلات زر و پبلک پرائیویٹ پارٹنر شپ کون آ بشخ آتے پین منظم کننگ مرے۔ وزیراعظم داوخت آ ایف بی آر اٹی برجا اصلاحات نا خاص وڑاٹ ذکر ءِ کرسا پارے کہ خراج آتا نظام اٹ اصلاحات، نظام ءِ آسان و فعال کننگ حکومت نا اولیت آتے ٹی اوار ءِ۔
