اسلام آباد۔ 22اپریل (اے پی پی) صدر مملکت ڈاکٹر عارف علوی پارینے کہ پاکستان و سعودی عرب نا نیام اٹ اسیجائی تاریخ، دودوربیدگ، روایت، عقیدہ و قدر انا رشتہ ءِ، پاکستان برادر ملک اتون تعلقداری تے پین سوگو کننگ خواہک۔ داہیت ءِ او سعودی عرب کن پاکستان نا پندار سفیر لیفٹیننٹ جنرل (ر) بلال اکبر تون گپ وتران کرسا پارے ہرا پنچ شنبے نادے آ داڑے ایوان صدر اٹی اوڑتون اوڑدہی کرے۔ صدر مملکت پارے کہ پاکستان سعودی عرب تون تعلقداری تے بھاز اہمیت ایتک، ہڑتوم آ ملک آتا نیام اٹ اسیجائی تاریخ، دودوربیدگ، روایت، عقیدہ و قدر انا رشتہ ءِ۔ صدر مملکت پارے کہ پاکستان برادر ملک سعودی عرب تون ہڑتوم آ کنڈآتا تعلقداری تے پین سوگو کننگ خواہک،ہڑتوم آ ملک آک، علاقائی و جہانی امور آ اسیجائی خیال تخرہ۔ صدر عارف علوی سعودی عرب اٹ رہینگوک آ پاکستانی تے آسراتی فراوان کننگ نا گرج آ زور شاغسا پندار سفیر ءِ تاکید کرے کہ او سعودی عرب اٹ پاکستانی کمیونٹی ءِ مون تروک ویل آتا ایسر کننگ آ چکار کے۔ اوپندار سفیر ءِ مبارکبادی تس و دا اومیت نا درشانی ءِ کرے کہ او پاکستان و سعودی عرب نا نیام اٹ ہڑتوم آ کنڈآتا اقتصادی کمکاری و زرکاری ءِ پین مون آ دننگ کن کوشست کیک۔ صدر مملکت پندار سفیر آ زور شاغا کہ او ہڑتوم آ ملک آتا نیام اٹ بڑزکو کہولی ڈل آتا ہن و بر کن کوشست کے۔ صدر عارف علوی سعودی عرب اٹی غٹ کہول آتیا بھارتی غیر کانودی مقبوضہ جموں و کشمیر ناویل ءِ تالان کننگ نا گرج آ ہم زور شاغا۔
