اسلام آباد۔ 22اپریل (اے پی پی) بنجائی وزیر داخلہ شیخ رشید احمد پارینے کہ پاکستان نا فوج ہزار آ جان تا قربانی تیان پد دہشت گردی ءِ شکست تس، عظیم فوج اٹ دہشت گردی نا ہرجلہو ءِ شکست ایتنہ، 22 کروڑ بندغ ملکی دفاع کن سلہہ بند فوج اتون ہم کوپہ سلوک ءُ، پاکستان ءِ تہہ آن نزور کننگ نا پیشن ناکوشست آک برجاءُ، کوئٹہ دھماکہ خودکش ئس، جلہو گیر دھماکہ نا وخت آ گاڈی ٹی ہی تولوک ئس، انٹیلی جنس رپورٹ آک ئسر کہ ملک دشمن بھلا شارتے ٹی دہشت گردی کننگ خوارہ،وزارت داخلہ نا ماتحت 22سیکورٹی ادارہ غاتے سیکورٹی ہائی الرٹ کننگ نا پارت کرینے۔ او پنچ شنبے نادے آ وزارت داخلہ ٹی پریس کانفرنس آن تران کریکہ۔ بنجائی وزیر شیخ رشید احمد پارے کہ کوئٹہ دھماکہ غان پد وزیراعلیٰ بلوچستان تون ہیت مسنے، چیف سیکرٹری، آئی جی، ایف سی کمانڈرتون ہم رابطہ مسنے دراصل پاکستان نا شونداری نا دشمنک عمران خان حکومت نا سوگوی ءِ نسخان تننگ خوارہ۔ اوپارے کہ بلوچستان اٹی13چوکی تا کمان پولیس ءِ تسوسن، ایف سی پین چوکی تے ہلنگ کن تیار ءِ ولے تدوک آ نن سوا 10 بجہ غا مروک آ خودکش جلہو آن پد داسہ دابارواٹی گڑاس سوچ بچارکروئی تمک۔ اوپارے کہ کوئٹہ دھماکہ ٹی5بندغ زوال و 11بندغ ٹھپی مسر ہرافتیان طبی امداد آن پد 6ٹھپی تے ہسپتال آن ڈسچارج کننگانے، 5 ٹھپی درمان مننگ ءُ، ہرافتیان 2نا حالیت نازرک ءِ۔ اوپارے کہ خودکش دھماکہ کن 60 آن 80 کلوگرام دھماکہ خیز مواد کاریم اٹ اتنگانے۔ خودکش جلہو گیر گاڈی ٹی تولوک ئس ہرانا داسکان درستی راستی مننگ کتنے وخت اس کہ گاڈی ءِ فرانزک کن گدریفنگانے۔ چیف سیکرٹری ءِ دمدستی جاست وپاست نا پارینن وحتمی رپورٹ جاست وپاست آن پد مون آ بریک۔ اوپارے کہ کوئٹہ دھماکہ نا اخس کہ مذمت ءِ کننگے کم ءِ۔ پاکستان نا شونداری ءِ ملک دشمنک نزور کننگ خوارہ۔ دونیم آن 3لکھ سوشل میڈیا اکاؤنٹ بیرہ بھارت آن تدوک آ 10دے اٹی ملنگا۔ شیخ رشید پارے کہ گوادر و بلوچستان ملک انا شونداری نا پن ءِ، گوادر پاکستان نا آخبت ءِ، چین ننا آزموندہ سنگت ءِ، و ننا چین اتون سنگتی کوہ ہمالیہ غان ہم بڑز ءِ، داوڑنا حالیت آتے ٹی دھماکہ نا اسل مسخت پاکستان نا امن ءِ شیف وبڑز کننگ ءِ و اودے نسخان تننگ ءِ۔ اوپارے کہ پاکستان نا ادارہ غاک، وزارت حوالکاری و شینکاری، وزارت انفارمیشن ٹیکنالوجی اواری اٹ سوشل میڈیا نا ایسر اس اتنگ اُن وخت اس کہ وزارت داخلہ امن و ایمنی نا بابت اہم بل اس ایوان اٹ اتنگ ءِ۔ اسہ سوج اسے نا ورندی ٹی اوپارے کہ ابصار عالم نا کیس انا جاست وپاست مننگ ءِ، تعلقدار ادارہ غاتے اِرادے انا مہلت تسونن، غٹ سی سی ٹی وی کیمرہ اتے ہُننگ انگ ءِ۔
