اسلام آباد۔ 22اپریل (اے پی پی) وزیر خارجہ مخدوم شاہ محمود قریشی پارینے کہ پاکستان و ایران نا تعلقداری اسہ پوسکن ءُ رخ اس اختیار کرینے۔ پاک ایران تعلقداری ٹی اسہ پوسکن ءُ بشخ اسے نا ودکی نظر بننگ ءِ۔ اوغانستان نا باندات آ ننا ایران تون، اینو ہرا مماثلت و یکسوئی ءِ او مہالو اسل الوکہ۔ پنچ شنبے نادے آ مشہد آ روانہ مننگ آن مست دورہ ایران و ایرانی سرکڑدہ غاتون مروک آ اوڑدہی تا بابت اہم ءُ ویڈیو بیان اسے ٹی وزیر خارجہ پارے کہ کنا ایرانی سرکڑدہ غاتون اوڑدہی تا چرجوئی داسہ پورو مسنے۔ کنا ایران نا صدر حسن روحانی تون بھاز جوان ءُ اوڑدہی اس مس۔ ایرانی صدر داہیت آ امنا کرے کہ تدو ک آ دونیم سال اٹی پاکستان و ایران نا نیام اٹ ہڑتوم آ کنڈآتا تعلقداری ٹی خوشگوار گچینی بسنے و ہڑتوم آ ملک آتا نیام اٹ برادرانہ تعلقداری پین کڑمب مسنے۔ داکان بیدس کنا ایران نا پارلیمان نا اسپیکر تون اوڑدہی مس، نن داہیت آ امنا کرین کہ ہڑتوم آ کنڈآتا تعلقداری نا سوگوی و الس نا کہول آ رابطہ غاتے ودفنگ اٹ پارلیمان نا کڑد بھاز اہمیت تخک۔ نن داہیت آ ہم امنا کرین کہ دیکی ٹی اسلاموفوبیا ہراترندی اٹ تالان مننگ ءِ اونا برخلاف پاکستان آنبار، ایران نا پارلیمان ہم کڑد ادا کے۔ نن امنا کرین کہ اسلاموفوبیا نا ودوک آ رجحان ءِ توننگ و مخلوق اٹ حرمت رسول صلی اللہ علیہ و آلہ وسلم نا بابت آگاہی ودی کننگ کن پاکستان و ایران نا عالم تے تینا کڑد ءِ ادا کروئی مریک۔ ایران نا وزیر خارجہ جواد ظریف صاحب تون ایران نا وزارت خارجہ ٹی اوڑدہی مس۔ نن ہڑتوم آ کنڈآتا تعلقداری تیا سرجمی اٹ شرہ کرین۔ نن اوغانستان نا حالیت آتیا گپ وتران کرین۔ وزیر خارجہ پارے کہ اوغانستان نا معاملہ غا ننا ایران اتون، اینو ہرا مماثلت و یکسوئی ءِ او مہالو اسل الوکہ۔ نن اسلاموفوبیا نا برخلاف اواری اٹ چلینگ نا عزم ءِ پوسکن کرینن۔ اوکنے امریکہ تون مروک آ جے سی پی او اے مذاکرات نا بابت پت اٹی ہلک۔ شاہ محمود قریشی پارے کہ ای داہیت ءِ پت اٹ پاننگ کیوہ کہ پاکستان و ایران ناتعلقداریک اسہ پوسکن ءُ رخ اس اختیار کرینو۔ دانا پیدوار درور پاکستان و ایران نا نیام اٹ طے مروک آ مفاہمتی یات داشت ءِ ہراٹی سیمی علاقہ غاتے ٹی واپاری، ہند آتا ملنگ نا بنامننگ ءِ۔ نن مند و پشین اٹ اسہ پوسکن ءُ کراسنگ پوائنٹ اسے نا بناءِ کرینن، داکراسنگ پوائنٹ آتا ملنگ آن نئے بیرہ، شاری تے فائدہ مریک بلکن ننا ہڑتوم آ کنڈآتا واپار ءِ ہم سوگو مریک۔ وزیر خارجہ پارے کہ ای تہران آن بھاز است جمی اٹ پدی بننگ اُٹ، کنے ایران و پاکستان نا تعلقداری تیٹی اسہ پوسکن ءُ بشخ اسے نا ودکی نظر بننگ ءِ۔
