نوشہرہ۔ 21اپریل (اے پی پی) وزیراعظم عمران خان پارینے کہ زورآور آک کانود نا شیف بننگ خواپسہ، پی ڈی ایم کون آ سیوت اس جوڑ کیرہ، او خوارہ کہ او دُزی کیر، ڈاکہ خلیر و منی لانڈرنگ کیر ولداہم اوفتے کس اس ہلپ، غٹ بشخ آتیٹی مافیاک تولوک ءُ، شوگر مافیا کبین بورہ بہا کیک و خراج تفک، نزور و زورآور کن کانود بایدے اسٹ مرے، ساڑی آ حکومت اڑزآن اُراتا تغ ءِ ایسر اسکان سرکرے۔ بینک آتے نیزگار مخلوق ءِ وام تننگ نا عادت اف، وام تا جاری کننگ نا عمل ءِ بایدے ترند کننگے، ہرا راج تینا نزور و نیزگار تپہ نا خیال ءِ تخپک او شون ہلنگ کپک، ہنکین تا چرجوئی ءِ مچ آ ملک اٹی تالان کینہ، آبادی نا ودنگ و شارتا تالانی آن فوڈ سیکورٹی نا ویل ودی مریک۔ پوسکن آ پاکستان ہاؤسنگ ڈٹ آن کم کٹیا کروک بندغ آتے تینا اُرادوبریک، بنجائی حکومت ہر اُراغا 3 لکھ سبسڈی فراوان کیک۔ اوداخیال آتا درشانی ءِ چارشنبے نادے آ داڑے پوسکن آ پاکستان ہاؤسنگ ڈٹ انا رداٹ جلوزئی ہاؤسنگ اسکیم نا بنداو ءِ تخنگ نا دود آن تران کرسا کرے۔ وزیراعظم پارے کہ دا ہاؤسنگ اسکیم ہمو تپہ کن ءِ ہرا تینا اُرااس جوڑ کننگ نا وست تخپک۔ مچ آ ملک اٹی اولیکو وار دا ڈٹ انا بناءِ کننگانے۔ راج انا پہچان اوفتا اُرا و اوفتا سوسائٹی آں مفک، راج انا پہچان نزور و نیزگار تپہ غاتا وڑہنکین آ ن مریک۔ ہرا راج تینا نزور و غریب تپہ نا خیال ءِ تخپک او شون ہلنگ کپک۔ اوپارے کہ مدینہ ن اریاست اٹ خواجہ اکرم ﷺ ہرا انقلاب ءِ ایسوسس اونا بنداوی فلسفہ دا ئس کہ راج اٹ نزور تپہ، غریب، چوری و جنوزان تیکن راج اٹ احساس ودی کننگا و دا مہالو اسل داوڑ متویسس۔ ریاست اسہ فیصلہ اس کرے کہ مالی وسیلہ مرے یا مف داتپہ ءِ فائدہ تننگ نا ءِ و دا راج انا بنداو نا ارٹ میکو پلو کانود نا بالادستی ئس۔ وزیراعظم پارے کہ کانود نا بالادستی نا مطلب ءِ وار وار آ پہہ کننگ نا کوشست کننگ اٹی اُٹ ہرا پاکستان اٹ مخلوق ءِ سمجھ بفننگ ءِ۔ کانود نا بالادستی نا مطلب داکہ زورآور ءِ ہم کانود نا پابند کننگے۔ نزور بندغ آتے تو زورآور آن رکھ درکار مریک ولے زورآور مدام تینے کانود آن ایڑتر تکک و او تکک کہ اودے آسراتیک دوئی مریر۔ او ڈاکہ ہم خلے تو اودے کانود ہلپ۔ بنانا ری پبلک اٹ زورآور و داڑیل آتے کن اسہ جتاکانود اس مریک و نزور آتے کن پین کانود اس مریک۔ وزیراعظم پارے کہ ننا ملک اٹ زورآور کانود نا پابند مننگ خواپک و اوپی ڈی ایم کون آ تنظیم و سیوت جوڑ کیک و اونا مسخت بیرہ دادے کہ او تینے خاص ءُ بندغ اس تکک و اودا سمجھک کہ دُزی کے، ڈاکہ خلے و منی لانڈرنگ کے اودے کانود نا شیف اتنگپ۔ ہموفک بلیک میل کیرہ۔ ہنداوڑ ننا ملک اٹی شوگر مافیا ءِ ہرا مخلوق ءِ کبین بورہ بہاکیک و نہاد آتے ودفسا نیزگاری ٹی ودکی کیک ولے داخراج تفسہ۔ ہراتم اوفتا برخلاف کارروائی کننگے تو اوہم تینے خاص تکرہ۔ ہر بشخ اٹی مافیاک تولوک ءُ۔ نزور و زورآور کن اسہ کانود اس بایدے مرے۔ وزیراعظم پارے کہ اسہ قوم اس ہم وسیلہ غاتا کمتی آن نیزگار مفک۔ کانود نا بالادستی ءِ پک کننگ نا گرج ءِ۔ الس نا بنداوی گرج آتے پورو کننگ ریاست نا بنداوی زمواری ءِ۔ نیزگار، مزور، چنکا دوکاندار و چھابڑی والا ہم دا است خواہی تخک کہ اوفتا تینا اُرامرے۔ اوفتا بارواٹ مہالو کس اس سجفتو۔ اوپارے کہ ہراتم وخت اس زمی جمب یا نوکاپ بریک و ہراوڑ قبائلی علاقہ غاتے ٹی جنگ مس تو زہمی مخلوق کیمپ آتیٹی رہینگار۔ اوغان باہوٹ آک ہم جلوزئی کیمپ اٹی رہینگانو۔ تینا اُرامفننگ نا خوف غٹ آن بھلو خوف اسے۔ ملک انا تاریخ اٹی اولیکو وار نیزگارو نزور تپہ کن ہاؤسنگ ڈٹ انا بناءِ کننگانے۔ مسکوہی وزیراعظم محمد خان جونیجو ہم کوشست کریسس ولے اونا اسکیم ہنداخاطرآن بے سہب مس انتئے کہ ہراڑے او اُراجوڑ کرے مخلوق ہموڑے رہینگ انگ ہی خواتوسہ۔ ساڑی حکومت نا کم خڑچ انا ہاؤسنگ اسکیم کن اول پورو سروے کننگا و ہرافتے تون اُرا اف اوفتے رجسٹرڈ کننگا۔ حکومت تون تو داخہ وسیلہ اف کہ او ہر کس ءِ اُراجوڑ کرساتننگ کے۔ دنیا ٹی ہم اسہ حکومت اس ہم داوڑ کننگ کپک۔ بینک آتے اُراتیکن وام تننگ آ رضامند کننگانے۔ حکومت نا کوشست ءِ کہ اڑزآن و زرکاری ڈغار آ اُراتفنگے۔ بنجائی حکومت ہر اُراغا 3 لکھ روپئی سبسڈی تننگ ءِ و اُرادوئی کروک آ کِرانا جاگہ غا قسط ترسا اُرانا مالک مننگ کیک۔ 25لکھ روپئی نا اُرا 22 لکھ روپئی ٹی ملک۔ اگہ اُراتا نہاد کم مریک تو بینک آتا قسط آک ہم کم مریرہ و اوتینا اُرانا خواجہ مریرہ۔ وزیراعظم پارے کہ خیبرپختونخواہ حکومت و پوسکن آ پاکستان اتھارٹی اواری اٹ ڈٹ آ کاریم کننگ ءُ۔ بینک آتون معاہدہ کننگانے۔ بیرہ 3 درسد مارک اپ آ وام ملک۔ ہاؤسنگ اسکیم نا دنگ ءِ خیبر پختونخواہ ناایلو ضلع غاتسکان ودفنگک۔ ننا کوشست ءِ کہ اولیکو ریسہ ٹی 9 ہزار 800کنا آ اُراتعمیر مریک۔ داڑے 4 فلور آ اپارٹمنٹ تعمیر مریک۔ اوپارے کہ ننا آبادی ودنگ ءِ و شار تالان مننگ ءِ۔ داڑآن فوڈ سیکورٹی نا ویل ہم ودی مریک۔
