پاکستان اٹی کشت وکشار،سیل و سوات وجنگل آتا بشخ اٹی انقلاب اس اتنگ اُن، وزیراعظم عمران خان نا پشاور درہ آدم خیل شندور روڈز انا بحالی نا دود آن تران

اسلام آباد۔ 21اپریل (اے پی پی) وزیراعظم عمران خان پارینے کہ پاکستان اٹی کشت وکشار، سیل و سوات و جنگل آتا بشخ اٹی انقلاب اس اتنگ اُن، پاکستان نا نادرن ایریہ غاک سیل و سوات نا اعتبار اٹ قدرتی زیبائی آن شپ ءُ، شندور، چترال گلگت روڈ آن دا بشخ اٹی انقلاب اس بریک۔ اوچارشنبے نادے آ پشاور اٹی پشاور درہ آدم خیل شندور روڈز انا بحالی نا دود آن تران کریکہ۔ داوخت آ وزیراعلیٰ کے پی کے محمود خان و بنجائی وزیر مواصلات مراد سعید ئسک ہم تران کریر۔ وزیراعظم پارے کہ کشت و کشار نا بشخ اٹی پوسکن ءُ ٹیکنالوجی اس اتینہ، فی ایکڑ پیدوار اٹ نمان ودکی کینہ، زعفران و زیتون دسنہ، سیل و سوات نا بابت علاقہ غاتا زوننگ ءِ کینہ۔ جنگل خلنگ آن ملک انا کٹیا ودک، داڑآن چاگڑدی باسنی اٹ کمتی بریک، اوپارے کہ سیل و سوات کن انفراسٹرکچر و ریزارٹ جوڑ کینہ۔ زونگ آن پد داڑے بائی لاز جوڑ کینہ تانکہ اسہ وڑوڈول اسے اٹ داڑے ہوٹل جوڑ مرے۔ سوئٹزر لینڈ اٹ ننا نادرن ایریہ غاتا مقابلہ ٹی نیمہ علاقہ ہم اف۔ ہموڑے اسہ ترتیب اسے اٹ ہوٹل چراہ گاہ جوڑ ءِ و او سالانہ 60آن 80 ارب ڈالر بیرہ سیل و سوات آن کٹرہ وخت اس کہ ننا برآمد آک 26ارب ڈالر ءُ۔ اوپارے کہ نن تینا دا علاقہ غاتا رکھ ءِ پک کننگ ءِ، داڑے جنگلی حیات نا رکھ ءِ کننگ ءِ۔ پوسکن ءُ جاگہ دریافت کروئی ءِ۔ اوپارے کہ روڈآک راج انا شونہالی نا پیدواری ءِ کیرہ۔ دانا گرج ہم مریک ولے داڑکن اولیت آتا گرج ءِ، مستین اٹ حکمرانک سیل و سوات نا کنڈآ چکار کتوس او تینا سرجزآتے لندن اٹ تینا ماڑی تیٹی گدریفیرہ۔ وزیراعظم پارے کہ موبائل فون دنیا ءِ بدل کرینے داسہ اسہ ہم علاقہ اسے ٹی سیل و سواتی ہند آتا تشہیر کن اشتہار و فوٹوگرافر آتا خذمت دوئی کننگ نا ضرورت اف، ہمونگیا ہنوک آ سیل و سواتیک دا کاریم ءِ کیرہ۔ کمراٹ نا اسہ ویڈیو اس سوشل میڈیا غا شاغنگ آن اِراہفتہ ٹی اسہ لکھ سیل وسواتی ہمونگیا بسر ولے انفراسٹرکچر نا کمتی ئس۔ اوپارے کہ سوات موٹروے سوات ءِ بدل کریداسہ یخ آتے ٹی ہم سیل و سواتیک بریرہ، سیل و سوات آن پاکستان اٹ زرگزرانی انقلاب بریک۔