اسلام آباد۔ 21اپریل (اے پی پی) ایران پاکستان تون واپار، زرکاری، رابطہ غاتا استواری و سیم انتظام(باڈر مینجمنٹ) اٹ ہڑتوم آ کنڈآتا تعلقداری تے پین ودفنگ نا عزم انا درشانیءِ کرینے۔ وزیر خارجہ مخدوم شاہ محمود قریشی چارشنبے نادے آ تہران اٹ ایران نا صدر ڈاکٹر حسن روحانی تون اوڑدہی کرے۔ داوخت آ ایران اٹی تعینات پاکستانی سفیر رحیم حیات قریشی ہم وزیر خارجہ تون اوار ساڑی ئس۔ داکان مست صدارتی ماڑی آ بننگ آ وزیر خارجہ شاہ محمود قریشی ءِ جم و جوش اٹ بخیر کننگا۔ وزیر خارجہ صدر پاکستان ڈاکٹر عارف علوی و وزیراعظم عمران خان نا کنڈآن، صدر روحانی و برادر ایرانی قوم اکن نیک است خواہی و خیرخواہی نا کلہو ءِ سر کرے۔ وزیر خارجہ پارے کہ پاکستانی سرکڑدہ، کشمیری مسلمان تا نکتہ نظر نا پدریسہ مخ تفی آ ایرانی سپریم لیڈر عزت مآب آیت اللہ سید علی خامنائی و صدر روحانی نا حکومت ءِ خراج تحسین پیش کیک۔ وزیر خارجہ ایرانی صدر تون پاکستان و ایران نا متکن آ برادرانہ تعلقداری تے پین سوگو کننگ نا وڑوڈول آتیا گپ وترا ن کرے۔ اوپارے کہ ہڑتوم آ ملک آتے ٹی اسیجائی تاریخ، دودوربیدگ،مذہب و زبان آ مبنی خوشگوار خڑکی و سوگو تعلقداری استوار ءِ۔ نن، وزیراعظم عمران خان نا وژن ءِ مون آ تخسا، برادر ملک ایران تون، ہڑتوم آ کنڈآتا تعلقداری نا سوگوی اتون اواراوار، تین پہ تینی است خواہی نا چندی بشخ آتے ٹی ہڑتوم آ کنڈآتا کمکاری نا مون آ دننگ کن سنبرینگوک اُن۔ صدر حسن روحانی ایران نا کنڈآن، واپار، زرکاری، رابطہ غاتا استواری و سیمی انتطام(باڈر مینجمنٹ) اٹ پاکستان تون، ہڑتوم آ کنڈآتا تعلقداری ءِ پین ودفنگ نا ایرانی عزم انا درشانی ءِ کرے۔
