پاکستان اقوام متحدہ نا مسہ اہم ادارہ غاتا رکنیت ءِ دوئی کرے، ترجمان دفترخارجہ

اسلام آباد۔ 21اپریل (اے پی پی) پاکستان اقوام متحدہ نا مسہ اہم ادارہ غاتا رکنیت ءِ دوئی کرے۔ چارشنبے نادے آ ترجمان دفتر خارجہ نا رداٹ نیویارک اٹی اقوام متحدہ نا ہیڈ کوارٹر اٹی مروک آ گچین کاری تیٹی، پاکستان اقوام متحدہ نا مسہ اہم ادارہ ڈوہ انا توننگ و کریمنل جسٹس نا بابت کمیشن(سی سی پی سی جے)، زالبول آتا حیثیت نا بابت کمیشن(CSW) و پاپولیشن اینڈ ڈویلپمنٹ نا بابت کمیشن(سی پی ڈی) نا رکنیت ءِ دوئی کرے۔ ترجمان نا پاننگ ءِ کہ دا کمیشن چندی معاشرتی و زرگزرانی باندا ت آ جہانی کمکاری ءِ ودفنگ اٹ کلیدی کڑد ادا کیک۔ دا گچین کاری اقوام متحدہ نا 54باسکی پرنسپل آرگنائزیشن اقتصادی و راجی کونسل (ای سی او ایس او سی) ٹی اڈ ہلک۔ سی سی پی سی جے و سی پی ڈی کن پاکستان نا گچین کاری اقتصادی و راجی کونسل نا غٹ باسک آتا کنڈآن امنائی سلاہ اٹ عمل اٹ اتنگا وخت اس کہ سی ایس ڈبلیو ٹی گچین کاری کن پاکستان 50 وونٹ ہلک۔ پاکستان ہمو ہرمسٹ آ کمیشن تا رکنیت ءِ یکم جنوری 2022آن سنبھالک۔ پاکستان نا اسہ وخت اٹ دا ہرمسٹ آ کمیشن تا گچین کاری اقوام متحدہ ٹی پاکستان نا فعال کڑد و تعمیری شریدار ی آ جہانی برادری نا پت انا ڈیک ءِ۔ دا کمیشن تا رکنیت نا کمک اٹ پاکستان جہانی کہول آ منظم ڈوہ انا مقابلہ ءِ کننگ و کریمنل جسٹس انتظامی نظام ءِ ساف کننگ، صنفی بریبری و زالبول آتے واکدار کننگ و آبادی نا حساب وکتاب و معلومداری نا تیاری و تجزیہ کننگ اٹ ملک آتا لائخی ءِ ودفنگ کن جہانی کمکاری ءِ مون آ درسا کیک۔