اسلام آباد۔ 21اپریل (اے پی پی) بنجائی وزیر ڈٹ بندی، شونداری اصلاحات و خصوصی گام گیج و نیشنل کمانڈ اینڈ آپریشن سینٹر نا سروک اسد عمر پارینے کہ ملک اٹی کورونا دین انا کیس آتے ٹی ودکی نا سوب آن جمعہ آن پوسکن آ بندش آتا بناءِ کینہ وخت اس کہ گڑاس بھلا شار تے بند کروئی تمنگ کیک۔ نیشنل کمانڈ اینڈ آپریشن سینٹر (این سی او سی) نا دیوان آن پد میڈیا ءِ حوال اٹی اسد عمر پارے کہ این سی او سی ٹی کورونا حالیت آتا جاچ ءِ ہلنگا۔ حالیت آک جوان خننگ پننگ ءُ، تدوک آ سال قوم ایس او پی تیا عمل کرے، داوار عمل مفننگ ءِ و رکھی گام گیج نظر بفننگ ءِ وخت اس کہ انتظامیہ ہم کارروائی کپننگ ءِ۔ اسد عمر پارے کہ کراچی ٹی کورونا کیس آتا کچ 13 درسد و حیدرآباد اٹی 14 درسد ءِ۔ ہسپتال آ ہنوک آ ناجوڑ آتا کچ 600 آن زیات مسنے۔ داناجوڑآتا سرمننگ آن پد منٹ نا طب پین خراب مریک و اوفتے آکسیجن آ خلوئی تمک۔ اسد عمر پارے کہ آکسیجن آ ناجوڑ آتا کچ 4500آن گدرینگانے۔ جون اٹ دین انا اولیکو ریسہ ٹی آکسیجن آ کورونا نا ناجوڑ آک 3400آں زیات ئسر یعنی دا وار 30 درسد زیات ناجوڑ آکسیجن آٹو۔ اوپارے کہ ننا رواں ہفتہ بھاز خطرناک ءِ۔ پاکستان اٹ دین انا بناآن داتم اسکان داہفتہ زوال کروک آتا کچ غٹ آن زیات ءِ، چندی شارک ہندن ءُ ہراڑے وینٹی لیٹر آتا کاریم اٹ اتنگ 80 درسد آن ہم زیات مسنے۔ ملک اٹی ہراآکسیجن ءِ جوڑ کننگک اونا کچ ہم لاتعداد اف۔ ہنداخاطرآن ننے آکسیجن نا سپلائی چین خطرناک حداسکان ودسا نظر بننگ ءِ۔ بنجائی وزیر نا پاننگ ئس کہ اینو این سی او سی ٹی پین گڑاس فیصلہ کرین ہرافتے صوبہ غاتون شیئر کینہ و جمعہ آ دا فیصلہ غاتا پڑو ءِ کینہ، ہرافتے ٹی پین بندش آتے ودفوئی تمک انتئے کہ ہراوڑ داوخت آ دین انا تالانی ءِ، اگہ دا دین انا زور ءِ دمدستی وڑاٹ پرغتون تو بھلا شار تے بند کننگ آن بیدس پین ہچ ءُ کسر اس مفک۔
