اسلام آباد۔ 21 اپریل (اے پی پی) بنجائی وزیر حوالکاری و شینکاری چوہدری فواد حسین پارینے کہ وزارت حوالکاری نا ذیلی ادارہ غاتے ٹی اصلاحات اتنگ نا عمل ءِ ترندی اٹ پورو کننگک، پی ٹی وی ءِ ایچ ڈی، اے پی پی ءِ ڈیجیٹل نیوز، پی آئی ڈی نا اشتہار آتا عمل ءِ پین گچین و پیپرلیس کننگک، پی ٹی وی انگلش چینل نا زوت بنداو ءِ تخنگک۔ بنجائی وزیر حوالکاری چوہدری فواد حسین آخبت اٹی وزارت حوالکاری و شینکاری و اونا ذیلی ادارہ غاتے ٹی اصلاحات آ ٹویٹ اٹی پارے کہ وزارت حوالکاری ٹی اصلاحات نا ہرا چرجوئی ءِ 2018ء ٹی بناکریسن اودے ہموکان دُوارہ بناکننگ انگ ءِ۔ پی ٹی وی نیوز ءِ ایچ ڈی کننگ نا ہرا ڈٹ 2019ء ٹی التواء ٹی ئس یکم جون اسکان پورو کننگ نا ڈیڈلائن تسونن۔ یکم جون آن پی ٹی وی نیوز پورو ایچ ڈی آ کاہک۔ ہندا سال پی ٹی وی اسپورٹس ہم ایچ ڈی مریک۔ ہنداوڑ پوسکن آ انگریزی چینل نا بنداو ءِ تخنگ اُن۔ چوہدری فواد حسین پارے کہ کراچی و لاہور نا اسٹوڈیو تے پی پی پی موڈ اٹ رینوویٹ کننگک و اے پی پیءِ ڈیجیٹل نیوز ایجنسی اس جوڑ کینہ۔ و پی آئی ڈی و اشتہار آتا نظام ءِ پورو وڑاٹ پیپر لیس کننگ نا گام گیج آتا بناءِ کرینن۔ ایکسٹرنل ونگ پورو وڑاٹ اپ گریڈ مریک۔ چوہدری فواد حسین پارے کہ فلم و راگ انا بحالی اولیکو اولیت ءِ، سرسید احمد خان و ٹیپو سلطان نا زند آ جہانی کہول انا پروڈکشن آ کاریم نا بناءِ کننگ انگ ءِ،ورناراگ و فلمساز آتے سرسہب ورنا پروگرام آن پنچ کروڑ روپئی اسکان وام انا آسودہی ایتنہ۔ اوپارے کہ پرنٹ و ٹی وی میڈیا تون گنڈوک صحافی تیکن وزیراعظم ہاؤسنگ پروجیکٹ آن جند انا اُرا و جان جوڑی کارڈ انا آسراتی ایتنہ۔ تنخواہ تا زرتس ءِ المی کننگ کن کانود جوڑ کننگ و انشورنس اتنگ اُن۔ اوپارے کہ پریس کلب ءِ آسراتی تننگ ہم کنا پالیسی مریک، ڈیجیٹل میڈیا ءِ پورو سپورٹ ایتنہ۔
