اسلام آباد۔ 21 اپریل (اے پی پی) جہانی ادارہ جان جوڑی (ڈبلیو ایچ او) پارینے کہ مچ آ دنیا ٹی ہر 10 آن 9 بندغ بے رکھ فضاٹی ساہ ہلنگ ءُ، مچ آ دنیا نا 6.76ارب آن زیات بندغ فضائی کچٹی آن براہ راست زہمی مسنو۔ بھاز وخت فضائی کچٹی نظر بریک و بھاز وخت داوڑمفک ولے اُراغان پیشن گام ءِ تخوک آ دنیا نا کم و ود ہربندغ داڑتون مون ایتک۔ حوال نا رداٹ فضائی کچٹی داوخت آ دنیا نا اسہ اہم ءُ ویل اسے ہراجان جوڑی نا چندی ویل آتا سوب مریک ہراٹی اسہ سال اٹی 7ملین آن زیات بندغ تینا جان آن دوتے سلانو۔ جہانی ادارہ جا ن جوڑی پارینے کہ کچٹی شون ہلوک یا پدتموک ملک آتا اسہ اسیجائی ویل جوڑ مسنے و داڑآن کم کٹیا کروک و پدتموک زیات زہمی مننگ ءُ۔ داوخت آ دنیا ٹی فضائی کچٹی آن اسٹ اس ہم رکھ اف انتئے کہ فضائی کچٹی کن ننا سیمک ہچ ءُ حیثیت اس تخپسہ۔ حوال نا رداٹ کچٹی نا سوب آن فضاٹی کاربن مونو آکسائیڈ، کاربن ڈائی آکسائیڈ، نائیٹرو جن ڈائی آکسائیڈ، سلفر ڈائی آکسائیڈ و داکان بیدس ایلو کیہی قاتل گڑاتا کچ فضاٹی دے پہ دے ودسا ہننگ ءِ ہرا ہرساہ اٹ ننا جون اٹ اوار مننگ ءُ و اگہ دا انسان نا خون ءِ ہم کپ تو فضائی کچٹی آن اوسط انسانی زند ءِ کم از کم اسہ سال کم ضرور کیک۔ ڈبلیو ایچ او جہانی برادری آ زور شاغانے کہ فضائی کچٹی نا ویل آتے کن جامع حکمت عملی نا رداٹ ہلہلہ ئی بنداو تیا گام گیج آتا گرج ءِ۔
