کوئٹہ۔ 21اپریل (اے پی پی) بنجائی وزیر دفاعی پیدوار زبیدہ جلال و ایران ناوزیر روڈ وشاری شونداری محمد اسلامی اینو ضلع کیچ تربت اتون گنڈوک پاک ایران بارڈر پیشین مند کراسنگ پوائنٹ نا بناءِ کرے۔ دابنائی دود انا وخت آ پاکستان وایران نا بڑزکو کمامدارآک ہم ساڑی ئسر۔ داوخت آ تران کرسا بنجائی وزیر دفاعی پیدوار زبیدہ جلال پارے کہ اینو نا دے پاکستان و خاص وڑاٹ بلوچستان نا الس کن تاریخی ءُ دے اسے، وزیراعظم پاکستان عمران خان نا کماشی ٹی ہڑتوم آ ایلم مسلم ہمسایہ ملک آتا تعلقداری تے تاریخی مون آ دننگ دوئی مننگ ءِ۔ و 6 تُو انا کم وخت اٹی اِراکراسنگ پوائنٹ ءِ ملنگ اسہ اہم ءُ مزل اسے۔ اوپارے کہ پاک ایران مند پیشین بارڈر کراسنگ آن علاقہ نا رہینگوک آتے روزگار و واپاری فائدہ دوئی مریک و علاقہ ٹی زرگزرانی و اقتصادی شونداری نا گچین وارخواہی تا فراوانی ممکن مریک۔ اوپارے کہ پاک ایران نا دا مسٹ میکو بارڈر کراسنگ پوائنٹ ءِ داکان مست دسمبر 2020ء ٹی ضلع گوادر تون گنڈوک گبد ریمدان نا ہم بناءِ کننگانے۔ دابارڈر کراسنگ پوائنٹ آن نئے بیرہ ہڑتوم آ ایلم مسلم ہمسایہ ملک آتا ہڑتوم آ کنڈآتا واپار بلکن تین پہ تینی تعلقداری و سیل و سوات ءِ ہم مون آ دننگ اٹ کمکار مریک۔ بنجائی وزیر دفاعی پیدوار زبیدہ جلال پارینے کہ وزیراعظم عمران خان بلوچستان آن پسماندگی نا چٹفنگ کن اولیتی گا م گیج کننگ ءِ ہراڑآن دا صوبہ ہم شونداری نا بابت ایلو صوبہ غاتا بریبر بریک۔
