اسلام آباد۔ 20اپریل (اے پی پی) پاکستان اٹی چین انا سفیر نونگ رونگ پارینے کہ پشاور اٹی جوڑ چینی دودوربیدگی و اطلاعاتی مرکز چائنا ونڈو صوبہ ٹی چینی کلچر ءِ درستی راستی کننگ اٹ اہم ءُ کڑد اس ادا کننگ ءِ، اونا خذمت آتے امنا کرسا اوڑتون کمکاری ءِ برجاتخنگک، اومیت ءِ چائنا ونڈو آخبت اٹ ہم ہڑتوم آ ملک آتا الس و چندی مکتبہ فکر انا مخلوق ءِ خڑک اتنگ اٹ تینا کڑد ءِ ادا کیک۔ پاک چین سفارتی تعلقداری نا 70 سال پورو مننگ آ چائنا ونڈوٹی خصوصی دود اس اڈتننگ آ نن چائنا ونڈو نا منت واراُن۔ او پشاور اٹی جوڑ چینی دودوربیدگی و اطلاعاتی مرکز چائنا ونڈو نا دورہ ءِ کننگ نا وخت آ میڈیا تون گپ وتران کریکہ۔ داوخت آ، چینی سفارت کار، خیبرپختونخوا زرکاری بورڈ انا چیف ایگزیکٹیو آفیسر حسان داؤد بٹ، چائنا ونڈو ناایڈمسٹریٹر امجد عزیز ملک و ایلوشخصیت آک ہم ساڑی ئسر۔ تینا دورہ نا وخت آ چینی سفیر نونگ رونگ چائنا ونڈو نا چندی گیلری ءِ ہرا، ویب سائٹ نا بناءِ کرے، پاک چائنہ فرینڈ شپ وال آ دستخط کرے و مہمان تا کتاب اٹی تینا تاثرآتے نوشتہ کرے۔ نونگ رونگ انتظامیہ نا کوشست آتا ستاءِ کرے۔ اونا مستی پاننگ اس کہ السی کہو ل آ رابطہ غاتا کمک اٹ پاکستان وچین نا الس ءِ پین خڑک اتنگ مریک ہراڑکن پشاور اٹی چائنا ونڈو نا کڑد بھاز اہم مریک۔ اسہ سوج اسے نا ورندی ٹی اونا پاننگ ئس کہ سی پیک آ کاریم نا رفتار کم اف بلکن بھاز زوت داعظم ڈٹ انا بھرمک پاکستان نا لس مخلوق اسکان سرمننگ نا بناءِ کرینو۔ اوپارے کہ پاک چین سنگتی نا تاریخ ہفت دہائی تیا تالان ءِ ہڑتوم آ ملک آتا بڑزکو سرکڑدہ غاک تین پہ تینی شونداری آ یخین تخرہ پاکستان و چین اسہ ایلو نا ایلم ءُ اوپارے کہ ہرمشکل دور اٹ اسہ ایلو تون کمک کننگانے اوپارے کہ چین کورونا نا دین انا حالیت آتے ٹی ہم پاکستان تون تین پہ تینی کمکاری ءِ پک کرینے، خاص وڑاٹ کورونا ویکسین نا چرجوئی ٹی پاکستان تون کمک کننگ ءِ و اجتماعی کوشست آتے اٹ کوویڈ ءِ شکست ایتنہ۔ اوپارے کہ رشکئی صنعتی زون سی پیک نا اہم ءُ ڈٹ اسے، چین رشکئی صنعتی زون نا شونداری ٹی تینا پبی کڑد ءِ ادا کیک اورنج لائن، گوادر پورٹ و ایلو شونداری نا ڈٹ آتے ٹی چین کمک کننگ ءِ اوپارے کہ سی پیک نا ڈٹ شوندساری اٹ مزل آتے طے کننگ ءِ سی پیک تون گنڈوک پوسکن آ ڈٹ آ ہم سجفنگ انگ ءِ سی پیک تون گنڈوک بھاز ڈٹ ءُ۔ بھاز مستائی الس ءِ رسینگک کورونا دین انا مون ءِ توننگ کن ہروڑنا گام گیج کرینن، چین اٹی خوانوک آ پاکستانی طالب علم آتا مشکل آتا چٹفنگ آ چکار کننگک۔ نونگ رونگ پارے کہ کورونا ویکسی نیشن چین اٹی جوان وڑاٹ برجاءِ ہراڑآن سفری حالیت آتے ٹی گچینی بریک،طالب علم و کاروباری تپہ نا چین آ بننگ نا چرجوئی بناکرینے۔ ہراڑآن ہڑتوم آ ملک آتے ٹی پین کمکاری ءِ مون آ دننگک۔ اوپارے کہ ہندن کہ حالیت آک گچین مریرہ ہڑتوم آ ملک آتا طالب علم آک آسانی اٹ ہِننگ بننگ کیرہ ایلو کنڈآ طالب علم آتا آسراتی کن آن لائن کلاس آتا ہم بناءِ کننگانے۔ چینی سفیر پارے کہ او وزیراعظم عمران خان و آرمی چیف اتون چندی اوڑدہی کرینے ہرانا است بڈ ءُ بھرم اس مون آ بریک۔
